जेठ १०, काठमाडौं ।नेपाल आयल निगमले आन्तरिकतर्फको हवाई इन्धनको मूल्यवृद्धि गरेसँगै हवाई भाडा बढेको छ ।
नेपाल वायु सेवा सञ्चालक संघले बुधवारदेखि लागू हुने गरी नयाँ भाडादर सार्वजनिक गरेको छ । नयाँ भाडादरमा ९० देखि ४४५ रुपैयाँसम्म वृद्धि भएको छ ।
सबैभन्दा लामो दूरीका रुपमा रहेको काठमाडौं–धनगढीको भाडा ४४५ रुपैयाँ बढेको छ । वृद्धि भएको भाडादर अनुसार काठमाडौं–सिमराको भाडा ३ हजार ७२५ रुपैयाँ कायम भएको छ भने काठमाडौं –धनगढी रु १५ हजार ६६५ कायम भएको छ ।
काठमाडौं–भद्रपुर ११ हजार ९३५ रुपैयाँ , काठमाडौं–विराटनगर ९ हजार ३२५ रुपैयाँ काठमाडौं–जनकपुर ५ हजार २५० रुपैयाँ, काठमाडौं–भरतपुर ४ हजार ४३५ रुपैयाँ र काठमाडौं–पोखरा ६ हजार ३०५ रुपैयाँ कायम भएको छ । काठमाडौं–भैरहवा ७ हजार ८८० रुपैयाँ, काठमाडौं–नेपालगञ्ज १२ हजार ८९५ रुपैयाँ र काठमाडौं–तुम्लिङटार ७ हजार ४६० रुपैयाँ कायम भएको छ ।
माउन्टेन फ्लाइटको भाडादर १३ हजार ७६५ रुपैयाँ कायम भएको संघले बताएको छ । नेपाल आयल निगमले आइतवार हवाई इन्धनको मूल्यमा प्रतिलिटर १० रुपैयाँ वृद्धि गरेको थियो । अहिले हवाई इन्धन (आन्तरिक) को मूल्य प्रतिलिटर १६६ रुपैयाँ छ ।
