काठमाडौं । गणतन्त्र कोरियाले साइबर ब्यूरो स्थापना गर्न ८० करोडभन्दा बढी आर्थिक सहयोग उपलव्ध गराउने भएको छ । सहयोगसम्बन्धी सम्झौतामा बुधवार राजधानीमा आयोजित एक कार्यक्रममा गृहसचिव टेकनारायण पाण्डे र कोरियाली अन्तरराष्ट्रिय सहयोग नियोग (कोइका)का देशीय निर्देशक सुनहुन कोले हस्ताक्षर गरेका छन् ।
उक्त रकम नेपाल प्रहरीको क्षमता अभिवृद्धि, साइबर अपराध विरुद्ध उनीहरूको सशक्तीकरण, साइबर ब्यूरोको अत्याधुनिक भवन निर्माण, साइबर अपराध अनुसन्धान र डिजिटल उपकरण, विधिविज्ञान प्रयोगशाला निर्माणमा उपयोग गरिने गृह मन्त्रालयले बताएको छ ।
कोइकाले नेपाल प्रहरीसँगको सहकार्य र समन्वयमा उक्त परियोजना आगामी ६ वर्षभित्र पूरा गर्नेछ । कोरिया सरकारले सन् २०४७ देखि स्वास्थ्य, व्यावसायिक तालीम, ग्रामीण विकास र सूचना प्रविधिका विभिन्न क्षेत्रमा कोइकामार्फत नेपाल सरकारलाई सहयोग गर्दै आएको छ । रासस
