वैशाख १७, काठमाडौं । चितवन राष्ट्रिय निकुञ्ज अन्तर्गतको कसरा हात्तीसार केन्द्रमा कार्यरत कर्मचारी(माहुते) को बाघको आक्रमणबाट मृत्यु भएको छ ।
शुक्रवार साँझ करीब साढे ५ बजेको समयमा बारा जिल्ला कोल्बी नगरपालिका–१ घर भएका करीब २३ वर्षीय माहुते रमेश चौधरी थारुलाई बाघले आक्रमण गरेको थियो । हात्तीसार केन्द्रमै आएर बाघले आक्रमण गरेपछि चौधरीको घटनास्थलमा नै मृत्यु भएको जिल्ला प्रहरी कार्यालय चितवनले बताएको छ ।
निजको घाँटीलगायतको भागमा चोट लागेको अवस्थामा प्रहरीले शव फेला पारेको थियो । शवको जाँच मुचुल्कालगायतको कार्य सम्पन्न गरि पोष्टमार्टमको लागि भरतपुर अस्पतालमा राखिएको छ ।