माघ २०, काठमाडौं । नेपाल राष्ट्र बैंकले वाणिज्य बैंकहरुसँग ७ लाख रुपैयाँ वा सोभन्दा बढी नगदमा भएका कारोबारहरुको पूर्ण विवरण मागेको छ ।
नियामक निकायको राष्ट्र बैंक सुपरीवेक्षण विभागले कारोबारको स्रोत पहिचानका लागि चालू आर्थिक वर्षको ६ महीने कारोबारको सुपरिवेक्षण गर्न लागेको हो । जसअन्तर्गत केन्द्रीय बैंकले बुधवार पत्रमार्फत वाणिज्य बैंकहरुसँग जानकारी मागेको छ ।
अब बैंकहरुले गत साउनदेखि पुससम्म भएका ७ लाख रुपैयाँभन्दा बढीको नगद कारोबार गर्नेको नाम, खाता नम्बरसहित रकम कहिले र किन निकालेको हो ? लगायत सबै विवरण केन्द्रीय बैंकमा पठाउनुपर्ने भएको छ । केन्द्रीय बैंकले आगामी माघ २४ गतेसम्म उक्त विवरण पठाई सक्न पनि भनेको छ । अहिले १० लाख रुपैयाँभन्दा बढीको नगद कारोबार गर्न पाइँदैन ।
यसबाहेक शंकास्पद कारोबार सम्बन्धमा अनिवार्यरुपमा वित्तीय जानकारी इकाईमा बैंक तथा वित्तीय संस्थाले जानकारी दिनुपर्ने प्रावधान छ । तर, अहिले आएर ७ लाख रुपैयाँभन्दा माथिका सबै नगद कारोबारको विवरण केन्द्रीय बैंकले वाणिज्य बैंकहरुसँग मागेको छ ।
सुपरीवेक्षण विभाग अन्तर्गतको सम्पत्ति शुद्धीकरण अनुगमन इकाईले सम्पत्ति शुद्धीकरण तथा आतंकवादी क्रियाकलापमा वित्तीय लगानी निवारणको अवस्थाबारे सुपरीवेक्षणको क्रममा यस्तो विवरण माग गरेको हो ।
पछिल्लो समयमा क्रिप्टोकरेन्सीलगायत गैरकानूनी डिजिटल कारोबारमा बैंकहरुको निक्षेप उपयोग भएको आशंका बीच राष्ट्र बैंकले कारोबारको विवरण मागेको स्रोतले बताएको छ ।
केहि दिन अघिको एउटा कार्यक्रममा अर्थमन्त्री जनार्दन शर्माले पनि पछिल्लो समय विभिन्न प्रविधिमार्फत् राजस्व चुहावटका घटनाहरू बढेको बताएका थिए । उनले क्रिप्टोकरेन्सी, डिजिटल क्यासिनो, डिजिटल नेटवर्किङलगायतका ‘अवैध’ कार्य भइरहेको बताएका थिए ।
