रोजगारको अवसरसहित महिलाहरूलाई जुत्ता सिलाउने तालिम दिइएको छ । एलाइन्स नेपाल र छाला जुत्ता उत्पादन संघले संयुक्त रूपमा तालिम दिएका हुन् । तालिम जेठ देखि भदौ ४ सम्म हुनेछ ।
तालिममा एलाइन्स नेपालको ४ लाख र छाला जुत्ता तथा वस्तु उत्पादन संघको २ लाख लगानी रहेको छ । तालिममा २० जनाको सहभागिता रहेको छ । तालिममा छनोट भएकाहरूलाई सिटिइभिटीबाट प्रमाणपत्र प्रदान गरिने संस्थाले जानकारी दिएको छ । प्रशिक्षार्थीहरूलाई रोजगारीको सुविधा पनि संस्थाले नै दिनेछ । संस्थाले महिला, द्वन्द्वपीडित, निम्नआय भएका र अशिक्षितहरूलाई तालिम दिइरहेको छ । तालिम ३–३ महिना गरी २ चरणमा गरिने बताएको छ । दोस्रो चरण साउनको पहिलो हप्तादेखि सुरु हुनेछ ।
‘तालिम २ महिना तालिम केन्द्रमै हुनेछ । त्यसपछि १ महिना कारखानामा ओजेटीका रूपका काम गराउनेछौं । ‘तालिमपछि प्रशिक्षार्थीहरूलाई काम खोज्न कतै जानै पर्दैन,’ कार्यक्रम संयोजक रबिन कुमार श्रेष्ठले बताए ।
‘छाला जुत्ता सिलाउने कामबाट अन्य पेशाबाट भन्दा बढी आमदानी हुन्छ,’ प्रशिक्षार्थी माया निरौलाले भनिन् । ‘यो तालिमपछि संस्थाले नै रोजगारी दिने हुनाले पनि तालिम लिएँ ।’ अहिलेको पितृसत्तात्मक समाजलाई चुनौती दिन तालिम लिएको उनले बताइन् । अर्की प्रशिक्षार्थी सुमिना श्रेष्ठले यो तालिम लिएपछि यसैलाई पेशाको रूपमा निरन्तरता दिन व्यवसाय सञ्चालन गर्ने बताइन्
वर्ष ५, अंक ४२, २०६७, असार ७–१३
