भृकुटीमण्डपमा छाला जुत्ता तथा वस्तुको प्रदर्शनी शुरू

काठमाडौं । काठमाडौंको भृकुटीमण्डपमा आठौं बृहत् राष्ट्रिय छाला जुत्ता तथा वस्तुको प्रदर्शनी शुरू भएको छ । नेपाल छाला जुत्ता उत्पादक संघले बुधवारबाट भृकुटीमण्डपमा प्रदर्शनी गरेको हो ।  प्रदर्शनीको उद्घाटन महिला, बालबालिका तथा ज्येष्ठ नागरिकमन्त्री भगवती चौधरीले गरेकी छन् । प्रदर्शनी फागुन ९ गतेसम्म चल्नेछ ।  उद्घाटन कार्यक्रममा मन्त्री चौधरीले नेपाली छाला जुत्ता उद्योगीहरूलाई प्रोत्साहन गरी उत्पादन बढाउने पक्षमा सरकार रहेको बताइन् । उनले पछिल्लो समय बजारमा देखिएको तरलता अभावलगायत समस्याबाट तत्काल उद्योगी व्यवसायीहरू निराश नहुन आग्रह गरिन् । उनले वर्तमान सरकार व्यवसायीहरूको समस्या समाधान गरी अर्थतन्त्रलाई चलायमान बनाउने पक्षमा रहेको बताइन् । उनले छाला जुत्ताको उत्पादन वृद्धि गरी निर्यात प्रवर्द्धनमा जोड दिनु पर्ने बताइन् ।  प्रदर्शनीमा नेपाल छाला जुत्ता उत्पादित कम्पनी आवद्ध विभिन्न उद्योगहरूले शतप्रतिशत छालाको प्रयोग गरी उत्पादन गरेका जुत्ताहरू राखिएको छ । छाला जुत्ता उत्पादनमा नेपाल आत्मनिर्भर बन्दै गएको संघले जानकारी दिएको छ । प्रदर्शनीको मुख्य उद्देश्य लघु घरेलु उद्योगलाई वैज्ञानिकरूपमा आधुनिकीकरण गर्दै विदेशमा निर्यात गर्ने वातावरण बनाई राष्ट्रिय अर्थतन्त्रलाई परिर्वतन ल्याउने रहेको आयोजकको भनाइ छ ।  मेलामा करीब ७० देखि ८० हजार दर्शक भित्र्याउने लक्ष्य संघको छ । मेलामा छालाका नयाँ डिजाइनका आधुनिक जुत्ता, चप्पल तथा छालाजन्य वस्तुहरू राखिनेछ । मेलामा नेपाली उत्पादन महिला, पुरुष र बालबालिकाका लागि जुत्तालगायत अल्लो र हेम्पबाट बनेका वस्तुहरू प्रदर्शनीमा राखिएको छ । मेलामा अपाङ्ग व्यक्तिहरूलाई विशेष छूटको व्यवस्थासमेत गरिएको छ ।