कञ्चनपुर । सुदूरपश्चिम प्रदेश सरकारको गौरवको योजनाअन्तर्गत निर्माण भइरहेको कलुवापुर–बेलौरी सडक स्तरोन्नति कार्य ८० प्रतिशत पूरा भएको छ । दुई खण्डमा विभाजित गरी सडकमा बेस राख्ने र कालोपत्र गर्ने कार्य भइरहेको छ । सडकको बेलौरीस्थित नेपाल–भारत सीमा क्षेत्रदेखि चाँनदेउसम्मको १४ किलोमिटर र चाँनदेउदेखि कलुवापुरसम्मको १४ किलोमिटर गरी २८ किलोमिटर क्षेत्रमा कालोपत्र भइरहेको छ ।
पूर्वाधार विकास कार्यालयका प्रमुख दीपकसिंह नेगीका अनुसार हालसम्म जम्मा ११ किलोमिटर सडकमा कालोपत्र सम्पन्न भएको छ । सडकको बाँकी भागमा कालोपत्र गर्ने काम भइरहेको छ । आव २०७२/७३ मा सन्तोषी थेगिम जेभीसँग १८ करोड २० लाखको लागतमा सडक कालोपत्र गर्न ठेक्का सम्झौता गरिएको हो । ठेक्का सम्झौता भए पनि निर्माण कम्पनीले विलम्ब गर्दा काम सम्पन्न हुन सकेको छैन । शुक्लाफाँटा राष्ट्रिय निकुञ्ज क्षेत्रभित्र पर्ने कालागौंडीदेखि चानदेवसम्मको करीब तीन किलोमिटर सडक कालोपत्र गर्ने कार्यका लागि बेस राख्ने कार्य पूरा भएको छ । ‘निकुञ्ज कार्यालयले वातावरणीय प्रभाव मूल्यांकन (ईआइए) प्रतिवेदन पेश नगर्दासम्म सडक कालोपत्र गर्ने कार्यअगाडि बढाउन दिएको छैन,’ कार्यालय प्रमुख नेगीले भने, ‘प्रतिवेदन तयार गरी पेश गर्ने प्रक्रिया अगाडि बढेको छ ।’ पुरानै सडकको मौजुदा संरचनाको स्तरोन्नति गरेर लैजाँदा निकुञ्जले अवरोध गरेको हो । २०१९ सालमा बेलौरीदेखि महेन्द्रनगर सदरमुकाम सारिएको थियो । बेलौरी सदरमुकाम हुँदा सञ्चालनमा आएको उक्त सडक कालोपत्र निर्माण अहिलेसम्म पूरा हुन पाएको छैन ।
प्रमुख नेगीले सडक डिभिजन कार्यालयबाट हस्तान्तरण भएर आएपछि सडक निर्माण कार्यलाई प्राथमिकता दिइएको बताए । बेलौरी नगरपालिकाका नगर प्रमुख पोतिलला चौधरी सडक कालोपत्र गर्ने कार्यलाई जति सक्दो छिटो सम्पन्न गर्नुपर्ने बताउँछन् । ‘विगतको तुलनामा सडक कालोपत्र गर्ने कार्य सन्तोषजनक रूपमा अगाडि बढेको छ,’ उनले भने, ‘निकुञ्जको अवरोधबारे प्रदेश सरकारलाई अवगत गराइसकेका छौं, सडक निर्माणसँगै बेलौरी बजार क्षेत्रमा नाली निर्माण गरिनुपर्छ भनेका छौं ।’ सडक कालोपत्र भएमा छोटी भन्सार कार्यालयको राजस्व संकलनमा समेत वृद्धि हुने बताइएको छ । रासस
