काठमाडौं । नेपाललाई विस्तारित कर्जा सुविधा (ईसीएफ) अन्तर्गतको तेस्रो किस्ता दिन अन्तर्राष्ट्रिय मुद्रा कोष (आईएमएफ) सहमत भएको छ । विस्तारित कर्जाको तेस्रो किस्ता दिन आईएमएफसँग स्टाफ-स्तरमा सहमत भएको हो । आईएमएफको कार्यकारी समितिले पारित गरेपछि मात्रै यो सहयोग नेपालले प्राप्त गर्नेछ भने मन्त्रीस्तरीय सहमतिसहित सम्झौता हुनुपर्नेछ ।
नेपाल आएको आईएमएफको प्रतिनिधिमण्डलले अर्थमन्त्री प्रकाशशरण महत, राष्ट्र बैंकका गभर्नर महाप्रसाद अधिकारीलगायत विभिन्न उच्च अधिकारीलाई भेटेको थियो । भेटमा अर्थमन्त्री महत र गभर्नर अधिकारीले ईसीएफ लिँदा सरकारले गरेको समग्र अर्थतन्त्रमा सुधार गर्ने प्रतिबद्धता कार्यान्वयन गर्ने प्रतिबद्धता जनाएपछि आईएमएफको टोली तेस्रो किस्ता निकासा गर्न सहमत भएको हो।
आईएमएफले ईसीएफमार्फत नेपाललाई प्रदान गर्ने ४९ अर्ब रुपैयाँ विस्तारित कर्जा सुविधाअन्तर्गतको तेस्रो किस्ता करिब पौने ७ अर्ब रुपैयाँ (५ करोड १३ लाख डलर) दिनेछ। योसँगै नेपालले कुल ४९ अर्ब रुपैयाँमध्ये २७ अर्ब ११ करोड रुपैयाँ (२० करोड ५४ लाख डलर) सहयोग प्राप्त गर्नेछ।
नेपालका लागि मिसन चिफको नेतृत्वमा आएको आईएमफको टोली नेपाललाई दिइएको विस्तारित कर्जा सुविधा (एक्स्टेन्डेट क्रेडिट फ्यासिलिटी) अन्तर्गत भइरहेका सुधार कार्यक्रमको कार्यान्वयन अनुगमन गर्न आएको थियो।
विस्तृत हेर्न यहाँ क्लिक गर्नुहोस्
