काठमाडौं । प्रिमियम मूल्यमा आईपीओ निष्कासन गरेका कम्पनीको शेयर मूल्य निरन्तर ओरालो लागेको छ । पछिल्लो समय प्रिमियम मूल्यमा आईपीओ निष्कासन गरी धितोपत्र दोस्रो बजारमा कारोबारमा आएका ७ कम्पनीमध्ये ५ ओटाको शेयर मूल्य घटेको छ, जसमा घोराही सिमेन्ट इन्डष्ट्रिज, रिलायबल नेपाल लाइफ इन्स्योरेन्स, सिटिजन्स लाइफ इन्स्योरेन्स, सन नेपाल लाइफ इन्स्योरेन्स र आइएमई लाइफ इन्स्योरेन्स छन् ।
प्राथमिक बजारमा महँगो दरमा आईपीओ निष्कासन गरेका यी कम्पनीहरूमा दोस्रो बजारमा भने लगानीकर्ताको आकर्षण देखिएको छैन ।
यी कम्पनीहरूको शेयर मूल्यमा कारोबारमा आएको एक–दुई दिन बढे पनि तेस्रो दिनबाट घट्ने गरेको पाइएको छ । खरीदकर्ताभन्दा पनि विक्रेता धेरै भएकाले शेयर मूल्य घटेको हो ।
प्रिमियम मूल्यमा आईपीओ निष्कासन गर्ने धेरैजसो कम्पनीको शेयरको संख्या धेरै छ । कम्पनीको शेयरको संख्या धेरै रहेकाले शेयरको आपूर्ति पनि बढेको छ । यस कारण दोस्रो बजारमा यी कम्पनीको शेयर मूल्य घटेको जानकारहरू बताउँछन् ।
प्रिमियममा आईपीओ निष्कासन गरेका कम्पनीहरूमध्ये घोराही सिमेण्टले सबैभन्दा महँगोमा शेयर निष्कासन गरेको थियो । कम्पनीले प्रतिकित्ता रू. ४३५ मा शेयर निष्कासन गरेको थियो । कम्पनीले अंकित मूल्यमा रू. ३३५ प्रिमियम थपेर आईपीओ निष्कासन गरेको थियो । कम्पनीको पहिलो कारोबार भने प्रतिकित्ता रू. ५६५ दशमलव ५० मा खुला भएको थियो । त्यसपछि कम्पनीको शेयर मूल्य अधिकतम रू. ५८१ दशमलव ४० सम्म पुगेको भए पनि गत बिहीवार यसको मूल्य प्रतिकित्ता रू.४३४ दशमलव ८ मा झरेको छ । यो आईपीओ मूल्यभन्दा पनि कम हो ।
त्यस्तै, चार जीवन बीमा कम्पनीले पनि नियामक निकाय बीमा प्राधिकरणले तोकेको चुक्ता पूँजी रू. ५ अर्ब पु¥याउनको लागि प्रिमियम मूल्यमा आईपीओ निष्कासन गरेका थिए । रिलायबल नेपाल लाइफले प्रिमियमसहित प्रतिकित्ता रू. २५७ मा आईपीओ निष्कासन गरेको थियो । कम्पनीको पहिलो कारोबार दिन प्रतिकित्ता रू.४८६ दशमलव ६ मा भएकोमा गत बिहीवार शेयर मूल्य घटेर ४२४ दशमलव ६ मा झरेको छ । कारोबार खुलेको पहिलो दिन कम्पनीको शेयर मूल्य उच्च हुँदा प्रतिकित्ता रू. ५३५ दशलमव २ सम्म पुगेको थियो ।
सिटिजन्स लाइफ इन्स्योरेन्सले प्रिमियमसहित प्रतिकित्ता रू. २४४ मा आईपीओ निष्कासन गरेको थियो । कम्पनीको पहिलो कारोबार दिन रू. ५०८ मा शेयर कारोबार खुला भएकोमा गत बिहीवार शेयर मूल्य प्रतिकित्ता रू. ४१० मा झरेको छ । त्यस्तै सन नेपाल लाइफ इन्स्योरेन्स कम्पनीले प्रिमियमसहित प्रतिकित्ता रू. २३९ मा आईपीओ निष्कासन गरेको थियो । यस कम्पनीको पहिलो कारोबार दिन प्रतिकित्ता रू.४७५ दशमलव २ मा शेयर कारोबार खुला भएकोमा बिहीवार रू. ४४० मा झरेको छ ।
आइएमई लाइफ इन्स्योरेन्स कम्पनीले प्रिमियम सहित प्रतिकित्ता रू. २३६ दशमलव ९१ मा आईपीओ निष्कासन गरेको थियो । कम्पनीको पहिलो कारोबार प्रतिकित्ता रू.५२९ दशमलव ५ भएकोमा बिहीवार कम्पनीको शेयर मूल्य रू. ४८० दशलमव ९० मा झरेको छ ।
प्रिमियममा आईपीओ निष्कासन गरेका बाँकी दुई कम्पनीहरूको शेयर मूल्य भने बढेको छ । माण्डु हाइड्रोपावरले प्रिमियमसहित प्रतिकित्ता रू. २०६ मा आईपीओ निष्कासन गरेको थियो । गत बुधवार पहिलो कारोबारका लागि कम्पनीको शेयर मूल्य रू. ३७३ दशमलव २ तोकिएकोमा गत बिहीवार कम्पनीको शेयर मूल्य बढेर रू.४४० दशमलव १० पुगेको छ ।
यस्तै, गत बिहीवार पहिलो कारोबारका लागि रू ३६१.१ तोकिएको भगवती हाइड्रोपावरको शेयर मूल्य बढेर रू.३९७.२ पुगेको छ ।
