काठमाडौं । सोल्टी होटल लिमिटेडले चालू आर्थिक वर्ष (आव)को दोस्रो त्रैमासिक वित्तीय विवरण सार्वजनिक गरेको छ । उक्त वित्तीय विवरण अनुसार होटलको खुद नाफा गत आवको दोस्रो त्रैमासको तुलनामा चालू आवको सोही अवधिमा ४१२ प्रतिशत वृद्धि भएको छ । गत आवमा होटलले रू. ४ करोड ९० लाख नाफा कमाएकोमा चालू आवको सोही अवधिमा बढेर रू. २५ करोड १४ लाख पुगेको हो ।
पछिल्लो समयमा पर्यटन व्यवसायमा सुधार आएकोले होटलको सञ्चालन आम्दानीमा उल्लेख्य वृद्धि भएकोले नाफा बढ्न पुगेको छ । गत आवमा होटलको सञ्चालन आम्दानी रू. ५ करोड २४ लाख रहेकोमा चालू आवमा बढेर रू. ३० करोड ६२ लाख पुगेको हो ।
त्यस्तै कम्पनीको कुल आम्दानी ११४ प्रतिशत वृद्धि भएको छ । गत आवमा होटलको कुल आम्दानी रू. ४४ करोड ७८ लाख रहेकोमा चालू आवमा बढेररू. ९६ करोड १ लाख पुगेको छ । नाफामा वृद्धि भएसँगै कम्पनीको प्रतिशेयर आम्दानी पनि वृद्धि भएको छ ।
गत आवमा कम्पनीको प्रतिशेयर आम्दानी रू. शून्य दशमलव ५८ रहेकोमा चालू आवमा बढेर रू. २ दशमलव ९८ पुगेको हो । त्यस्तै कम्पनीको मूल्य आम्दानी अनुपात ७४ दशमलव ३९ गुणा र प्रतिशेयर नेटवर्थ रू. २३ दशमलव ५१ रहेको छ । होटलको चुक्तापूँजी रू. ८४ करोड २५ लाख रहेको छ भने जगेडामा रू. १ अर्ब १३ करोड भन्दा बढी सञ्चित गरेको छ ।
