असार १०, बागलुङ । बागलुङ जिल्लाको काठेखोला गाउँपालिकाले आगामी आर्थिक वर्ष २०७८/०७९ को नीति तथा कार्यक्रम र बजेट पारित गरेको छ ।
गाउँपालिकाको बिहीवार सम्पन्न नवौं गाउँसभाले अध्यक्ष अमर बहादुर थापाले प्रस्तुत गरेको नीति तथा कार्यक्रम र उपाध्यक्ष अर्जुन बहादुर खत्रीले प्रस्तुत गरेको बजेट सर्वसम्मत पारित गरेको हो ।
गाउँपालिकाले आगामी आव २०७८/०७९ को नीति तथा कार्यक्रम र बजेटमा कोरोना महामारी सहित स्वास्थ्य र शिक्षा र पूर्वाधार विकासलाई प्राथमिकता दिएको छ ।
गाउँपालिका अध्यक्ष अमर बहादुर थापाले आगामी आर्थिक वर्षको नीति तथा कार्यक्रम प्रस्तुत गर्दै कोभिड–१९ को कारण पारिवारका सदस्य गुमाएका विपन्न परिवारका बालबालिकाहरुको अध्ययनका लागि पहिचान गरि गरीब तथा विपन्न राहत कार्यक्रम सञ्चालन गर्ने बताए ।
उनले हिंसा पीडितको उद्धार, गरिबी निवारणका लागि प्रधानमन्त्री रोजगार कार्यक्रमलाई प्रभावकारी र जीवन उपयोगी बनाउने नीति ल्याएको बताएका छन् ।
गाउँपालिकाले आगामी आर्थिक वर्षमा गाउँपालिका केन्द्रदेखि वडा कार्यालयसम्मका सडकहरुलाई थप स्तरोन्नित गर्दै ग्रावेल, ढलान र कालोपत्र गर्न पहिलो प्राथमिकता दिने र नयाँ ट्रयाक खोल्नलाई निरुत्साहित गरिने जानकारी दिएको छ ।
गाउँपालिकाले हरेक वर्ष गर्दै आएको खरको छाना विस्थापित कार्यक्रमलाई यसवर्ष पनि निरन्तरता दिँदै आव २०७८/०७९ मा बाँकी रहेका १३० घरपरिवारको खरका छाना विस्थापित गर्ने जानकारी दिएको छ ।
यस्तै, अध्यक्ष थापाले कोरोना महामारी रोकथाम तथा नियन्त्रणका लागि गाउँपालिका भित्रका स्वास्थ्यचौकीको महत्वपूर्ण भूमिका रहेकोले स्वास्थ्य क्षेत्रको प्रभावकारीता र यसको गुणस्तर वृद्धिका लागि आवश्यक पहिचान गरि ल्याब, बर्थिङ सेन्टर सञ्चालन गर्ने र पूर्वाधारका कार्यक्रम सञ्चालन गर्ने नीति तथा कार्यक्रम मार्फत जानकारी गराए ।
गाउँपालिकाले घरेलु तथा साना उद्योगहरुलाई प्रबर्द्धन गरि स्थानिय उत्पादनलाई विशेष जोड दिइने बताउँदै पहिचान भएका ८० जना उद्यमीहरुका लागि सीपमुलक तालिम सञ्चालन गरिने जानकारी दिएको छ ।
गाउँपालिकाले शिक्षा क्षेत्रमा पूर्वाधार, सडक पूर्वाधारमा जोड, सिँचाईका ठूला योजना, झोलुंगे तथा पक्कि पुल निर्माणका लागि संघ र प्रदेशसँग समन्वय गरिने नीति लिएको छ । कला संस्कृति, खेलकुद र भाषाको संरक्षण र प्रबर्द्धनलाई नीति तथा कार्यक्रममा जोड दिइएको छ । पर्यटन, कृषि र अन्य सामाजिक क्षेत्रलाई समेत समयानुकुल परिवर्तन गर्दै जाने नीति रहेको छ ।
यस्तै नवौ गाउँसभाले बिहीवार नै प्रस्तुत गरिएको आगामी आर्थिक वर्षको बजेट सर्वसम्मत पारित गरेको छ । आगामी आर्थिक वर्ष २०७८/०७९ को लागि गाउँपालिका उपाध्यक्ष अर्जुन बहादुर खत्रीले प्रस्तुत गरेको ५३ करोड ३१ लाख १४ हजार रुपैयाँको बजेट गाउँसभाले पारित गरेको हो ।
गाउँपालिकाले आगामी आर्थिक वर्षको लागि संघबाट वित्तिय सामानिकरण अनुदानतर्फ रू. १० करोड ६० लाख, संघिय सरकार ससर्त चालू अनुदानमा रू. २७ करोड ८३ लाख, प्रदेश सरकार वित्तिय समानिकरण अनुदानमा रू. १ करोड २२ लाख ७७ हजार, गाउँपालिकाको आन्तरिक आय रू. ५१ लाख ४६ हजार, संघिय सरकार समपुरक अनुदान रू. ३२ लाख संघिय सरकार समपुरक अनुदान रू. १ करोड ३७ लाख, संघिय सरकार राजस्व बाँडफाँट रू. ७ करोड १६ लाख ९१ हजार संघिय सरकार विशेष अनुदान १ करोड ७८ लाख, प्रदेश सरकार विशेष अनुदान रू. ५० लाख, समपुरक अनुदान रू. ५० लाख र संचित कोषबाट अनुमानित रू. १ करोड ५० लाख आम्दानी हुने जानकारी दिएको छ ।
गाउँपालिकाले आगामी आर्थिक वर्षको लागि पूर्वाधार विकासतर्फ सडक तथा पुल, सिँचाई, भवन तथा सहरी विकास, ऊर्जा, लघु जलविद्युत् र सञ्चारतर्फ रू. ३ करोड ११ लाख ७८ हजार सामाजिक विकासतर्फ शिक्षा, स्वास्थ्य, खानेपानी, खेलकुद, संस्कृति प्रबर्द्धन, लैंगिक समानता तथा सामाजिक समावेशिकरणमा १ करोड ५५ लाख ८९ हजार बजेट विनियोजित गरिएको उपाध्यक्ष खत्रीले बताए ।
