काठमाडौं । एनआईसी एशिया क्यापिटलको व्यवस्थापनमा सञ्चालित एनआईसी एशिया डाईनामिक डेप्ट फण्डले गत आर्थिक वर्ष (आव) ०७९÷८० को लाभांश वितरण थालेको छ ।
गत साउन १९ गते बसेको योजना व्यवस्थापकको सञ्चालक समितिको बैठकले करसमेत इकाईधनीहरूका लागि १० प्रतिशत नगद लाभांश वितरण गर्ने प्रस्ताव गरेको थियोे । भदौ १७ गतेदेखि सम्बन्धित इकाईधनीहरूको बैंक खातामा लाभांश जम्मा गर्न शुरु गरिएको योजना व्यवस्थापकले जानकारी दिएको छ ।
योजना व्यवस्थापकले लाभांश प्रयोजनका लागि गत साउन १९ गते बुक क्लोज गरेको थियो । बुक क्लोजको आधारमा अघिल्लो कारोबार दिनसम्म कायम इकाईधनीहरूले मात्र लाभांश प्राप्त गरेका छन् ।
खुलामुखी प्रकृतिको यस योजनाका इकाईनीहरूले प्राप्त गर्ने कर तथा निर्धारित डीपी शुल्क कट्टापछिको प्रतिफल रकम पुनः लगानी गर्न सक्ने व्यवस्थासमेत गरिएको थियो ।
लाभांश पुनः लगानी योजनामा सहभागी हुनका लागि योजना व्यवस्थापकले साउन ३२ गतेसम्मको मिति तय गरेको थियो । उक्त मितिसम्म सहभागी नहुने इकाईधनीहरूको लाभांश वितरण प्रक्रिया अघि बढाइएको हो ।
