चितवन । कुखुरापालनको राजधानीका रूपमा चिनिएको चितवनमा पछिल्लो ४ महीनामा ३१ पोल्ट्री फार्ममा बर्डफ्लुको संक्रमण देखापरेको छ । गत माघ २८ गते पहिलोपटक पूर्वी चितवनको राप्ती नगरपालिकामा देखिएको बर्डफ्लु पछिल्लो समय जिल्लाभरि नै फैलिएको हो ।
अहिलेसम्म बर्डफ्लु देखिएका फार्महरूमा दुई लाख ३३ हजार ३१२ लेयर्स कुखुरा मारिएको भेटेरिनरी अस्पताल तथा पशु सेवा विज्ञ केन्द्रका सूचना अधिकारी डा. प्रभास न्यौपानेले जानकारी दिए । उनका अनुसार गत माघ २८ यता विभिन्न स्थानमा ब्रोइलर जातका ६४६, कडकनाथ जातका ८९६ कुखुरा र ३५ ओटा हाँस नष्ट गरिएको छ ।
बर्डफ्लुका कारण जिल्लामा १ लाख ७८ हजार २२६ अण्डा, ६२ हजार ९२० किलोग्राम दाना, ५८ हजार २२० थान क्रेट हजार टर्की ब्रिडिङ अण्डा, ३ हजार ४७६ ओटा प्यारेन्ट ब्रोइलर कुखुरा नष्ट गरिएको केन्द्रको तथ्यांक छ । त्यस्तै १ हजार ३८० ओटा गिरिराज जातका कुखुराका अण्डा र ४० किलोग्राम तयारी मासु नष्ट गरिएको सूचना अधिकारी न्यौपानेले बताए ।
केन्द्रका अनुसार पूर्वी क्षेत्रमा बर्डफ्लुको असर बढी देखिएको छ । पछिल्लो पटक खनाल पोल्ट्रीमा बर्डफ्लु देखिएपछि त्यहाँका ९० हजार कुखुरा नष्ट गरिएको थियो । बर्डफ्लु देखिएकामध्ये जिल्लाको सबैभन्दा ठूलो फार्म खनाल पोल्ट्री हो ।
पूर्वी चितवनकै अर्को एक फार्ममा तीव्र परीक्षण गर्दा पोजेटिभ देखिएपछि थप परीक्षणका लागि नमूना काठमाडौं पठाइएको उनले बताए । सो फार्ममा १ लाख २० हजार लेयर्स जातका कुखुरा थिए । बर्डफ्लुले कुखुरा मर्न थालेपछि कतिपय कृषकले बजारमा विक्री गर्दा रोग तीव्र रूपमा फैलिएको अनुमान गरिएको छ । बागमती प्रदेश कृषि तथा पशुपक्षी विकास मन्त्रालयका सचिव डा. शरण पाण्डेले केही कृषकले संक्रमण देखिन थालेपछि कुखुरा विक्री गर्दा रोग फैलिएको बताए । रासस
