घर–घरमा शौचालय भएको विश्लेषण गर्दै दुई वर्षअघि नै काठमाडौं जिल्लालाई खुला दिसामुक्त घोषणा गरिएको थियो । जिल्ला खानेपानी सरसफाइ तथा स्वच्छता समन्वय समितिले ०७६ असोजमा काठमाडौंलाई खुला दिसामुक्त जिल्ला घोषणा गरेको थियो । खुला दिशामुक्त घोषणा गरिएको दुई वर्ष बितिसक्दा पनि काठमाडौंका प्रमुख बजार क्षेत्र भने पर्याप्त शौचालय छैनन् । भएका शौचालयहरु पनि प्रयोगलायक छैनन् । अत्यधिक भिडभाड हुने ठाउँ रत्नपार्क क्षेत्रमा पहिले ४ वटा शौचालय थियो । अहिले २ वटा मात्र शौचालय छन् । तर, भएका शौचालय छिरिसक्नु छैनन् । केहीको चुकुल लाग्दैन, कुनैमा ढोकाको पाता फुटेको छ । केहीमा पानी छैन । दिसापिसाबको दुर्गन्ध पनि उस्तै छ ।
