Reporters Nepal

श्रावण २०७८

नेकपाद्धारा एमसीसी खारेजीको माग गर्दै विरोधसभा आयोजना, विप्लवले सम्बोधन गर्दै (लाइभ भिडियो)

काठमाडौं, २८ भदौ । नेत्रबिक्रम चन्द ‘विप्लव’नेतृत्वको नेकपाले एमसीसी खारेजीको माग गर्दै विरोध सभा आयोजना गरेको छ । काठमाडौंको खुल्लामञ्चमा आयोजना गरेको विरोध सभालाई महासचिव विप्लवले सम्बोधन गर्ने कार्यक्रम रहेको छ । उक्त पार्टीले एमसीसी राष्ट्रघाती भएका ठहर समेत गरेको छ ।

पूर्ण विवरण

सम्बन्धित सामग्री

बीपीका चिकित्सक रिले अनसनमा

धरान । धरानस्थित बीपी कोइराला स्वास्थ्य विज्ञान प्रतिष्ठानमा बढ्दै गएको भ्रष्टाचार र अनियमितता सुधार गर्न माग गर्दै दुई सातादेखि आन्दोलनरत चिकित्सक तथा विद्यार्थीले माग सुनुवाइ नभएपछि सोमवारदेखि रिले अनसन शुरू गरेका छन् । प्रतिष्ठानमा कार्यरत तथा अध्ययनरत चिकित्सक तथा विद्यार्थीले प्रतिष्ठान सुधारको माग गर्दै उपकुलपतिको कार्यालयअगाडि धर्ना र विरोधसभा गर्दै आएका छन् । उक्त मागप्रति पदाधिकारी उदासीन भएको भन्दै आन्दोलनको स्वरूप परिवर्तन गरी उनीहरूले रिले अनसन थालेका हुन् । प्रतिष्ठानका प्रमुख पदाधिकारीहरूले आफूहरूको मागप्रति कुनै चासो नदेखाएपछि आन्दोलनलाई फरक ढंगले अघि बढाएको रिले अनसनको नेतृत्व गरेका प्रतिष्ठानको हाडजोर्नी विभागका चिकित्सक डा. विष्णु पोखरेलको बताए । उनीसँगै जुनियर रेसिडेन्ट वेलफेयर सोसाइटीका उपाध्यक्ष पदम नेपाली सहित एमबीबीएसका विद्यार्थी समेत अनसनमा बसेका छन् । आन्दोलनकै क्रममा आइतवार उनीहरूले प्रतिष्ठानका पदाधिकारीले प्रयोग गरेको सवारीसाधनको चाबी खोसेका थिए । ‘प्रतिष्ठानका पदाधिकारीले बीपी कोइराला स्वास्थ्य विज्ञान प्रतिष्ठान लेखिएको गाडी प्रयोग गरेका छैनन्, उनीहरूले सेवा सुविधा लिए पनि प्रतिष्ठानको कुनै मूल्यांकन नभएपछि चाबी खोसेका हौं,’ उनले भने । रिले अनसनले पनि पदाधिकारी सचेत नभए सामूहिक राजीनामा दिइने उनले चेतावनी दिए । रिले अनसन बस्न करिब ५० जनाले सामूहिक प्रतिबद्धता व्यक्त गरिसकेको उनको भनाइ छ । कार्यसम्पादन मूल्यांकनको आधारमा कारबाही गर्नुपर्ने माग गर्दै आफैबाट शुरू गर्न उपकुलपतिलाई आन्दोलनकारीले आग्रह गरेका छन् । कार्यसम्पादन गर्दा असफल हुने डरले उपकुलपति वार्ताबाट भागेको पनि उनीहरूको आरोप छ । प्रतिष्ठानका उपकुलपति डा. ज्ञानेन्द्र गिरी दुई सातादेखि काठमाडौंमा छन् । उनलाई तीन दिनभित्र प्रतिष्ठानमा उपस्थित भएर चिकित्सक तथा विद्यार्थीले उठाएको माग सम्बोधन गर्न धरानका राजनीतिक दल र नागरिक दबाब सञ्जालले अल्टिमेटम समेत दिएका छन् । प्रतिष्ठानको अनियमितताबारे अख्तियारको ध्यानाकर्षण गराउने डा. पोखरेललाई उपकुलपति गिरीले काठमाडौंबाटै स्पष्टीकरण पत्र काटेपछि चिकित्सक, विद्यार्थी, कर्मचारी र स्टाफ नर्सहरू दुई सातादेखि आन्दोलित बनेका छन् । आन्दोलनरत संयुक्त संघर्ष समितिसँग वार्ता गर्न उपकुलपति डा. गिरीले समिति गठन गरे पनि आन्दोलनरत पक्षले उपकुलपतिको उपस्थितिमा मात्र वार्ता गर्ने अडान लिएपछि वार्ता अघि बढ्न सकेको छैन ।

Aarthik Abhiyan जेष्ठ २०७८

महिला हिंसाका विरुद्ध राजधानीमा महिला संगठनहरूको प्रदर्शन र विरोधसभा

काठमाडौँ । महिलाहरूमाथि शृङ्खलाबद्ध रूपमा भइरहेका हिंसा, बलात्कार र हत्याका विरुद्धमा २०७७ फागुन ८ गते राजधानीमा विरोध प्रदर्शन र सभा सम्पन्न गरिएको छ । नेकपा (मसाल), नेकपा (क्रान्तिकारी–माओवादी), बिप्लव नेतृत्वको नेकपा, ऋषि कट्टेल नेतृत्वको नेकपा र नेकपा (संयुक्त) सँग आबद्ध महिला सङ्गठन मिलेर बनेको संयुक्त महिला सङ्घ सङ्घर्ष समितिको आयोजनामा सो विरोध प्रदर्शन र सभा सम्पन्न गरिएको हो । राजधानीको शान्तिबाटिका रत्नपार्कबाट सुरु भएको विरोध जुलुस असन, ईन्द्रचोक हुँदै बसन्तपुर डबलीमा पुगेर विरोधसभामा परिणत भएको थियो । अखिल नेपाल महिला सङ्घकी अध्यक्ष मीना पुनको सञ्चालनमा विरोध सभा अघि बढेको थियो । विरोधसभालाई सम्बोधन गर्ने महिला नेतृहरूमा अखिल नेपाल महिला सङ्घ (क्रान्तिकारी) की अध्यक्ष अम्बिका मुडभरी, बैज्ञानिक समाजवादी महिला सङ्गठनकी अध्यक्ष धनकुमारी सुनार, नेपाल महिला फेडरेसनकी सचिव आसा महर्जन र अखिल नेपाल महिला युनियनकी अध्यक्ष सीता सुवेदी रहेका थिए । सभालाई सम्बोधन गर्दै महिला नेतृहरूले देशमा शृङ्खलाबद्ध रूपमा भइरहेका महिलामाथिको हिंसा, बलात्कार र हत्याका विरुद्धमा सङ्घर्षमा जुट्न अपिल गरे । सरकार महिला हिंसाका घटनाप्रति संवेदनशील बन्न नसकेको भन्दै उनीहरूले बलात्कारी र हत्यारामाथि कडा कारबाही गर्न माग गरे । विरोधसभामा कवयित्री तथा लेखिका सरिता तिवारी र इन्दिरा अधिकारीले महिला हिंसाका विरुद्धमा सशक्त कविता वाचन गरेका थिए । भागरथी भट्टलगायत देशभरि भएका महिला हिंसा, बलात्कार र हत्याका विरुद्धमा आयोजित सो प्रदर्शनमा सहभागीहरूले “हत्यारा बलात्कारीलाई कारबाही गर”, “महिला हिंसा बन्द गर”, “बलात्कारीलाई सार्वजनिक गर”, “फासिवादी सरकार मुर्दावाद”, “भ्रष्टाचारीलाइ कारबाही गर”, “वैदेशिक हस्तक्षेप बन्द गर”, “हिंसा होइन, सुरक्षा दे”, “दमन होइन, अधिकार दे” र “संयुक्त महिला आन्दोलन जिन्दावाद” लगायतका नारा लगाएका थिए ।

Yug Darshan माघ २०७७

निर्मलाको जस्तै भागरथीका बलात्कारी हत्यारा उम्किन नदिन ठुलो दबाब आवश्यक’

दिनेश रैदास, दाङ । बैतडीकी किशोरी भागरथी भट्टको बलत्कारी र हत्यारालाई कारबाहीको माग गर्दै अखिल नेपाल राष्ट्रिय स्वतन्त्र विद्यार्थी युनियन (छैठौं) दाङले घोराहीको तुलसीपुर चोकमा विरोधसभा सम्पन्न गरेको छ । विरोधसभालाई सम्बोधन गर्दै अखिल (छैठौं) का केन्द्रीय सदस्य खगेन्द्रा विष्टले निर्मला पन्त र भागरथी भट्टको बलात्कारीलाई छिटो भन्दा छिटो कारबाहीको दायरामा ल्याउन माग गर्नुभएको थियो । उहाँले भन्नुभयो, ‘जसरी निर्मला पन्तको हत्यारालाई अहिलेसम्म अगाडि ल्याउन सकेको छैन, हत्यारालाई पक्राउ गर्न सकेको छैन। कतै त्यही भागरथी भट्टको पनि हुने होकी त्यसैले हजारौं हजार विद्यार्थी तथा जनता न्यायको लागि सडकमा आउन खाँचो छ ।’ कार्यक्रमलाई राष्ट्रिय जनमोर्चाका जिल्ला अध्यक्ष गणेश आचार्य र अखिल (छैठौं) दाङ जिल्ला उपाध्यक्ष सरिता पुनले पनि सम्बोधन गर्नुभएको थियो। प्रदर्शनमा निर्मला पन्त र भागरथी भट्टका बलात्कारी र हत्यारालाई कार्बाही गर, सम्पूर्ण बालिकाको सुरक्षा गर, सरकारी उदासिनता मुर्दावाद, अखिल (छैठौं) जिन्दाबादजस्ता नारासहित क्याम्पस रोड देखि बीपी चोक, सहिद मार्ग, बालमन्दिर चोक हुँदै तुलसीपुर चोकसम्म जुलुस निकालिएको थियो । कार्यक्रमको सञ्चालन ध्रुव बेल्बासेले गर्नु भएको थियो।

Yug Darshan पौष २०७७

पोखरामा विरोधसभा तथा प्रशिक्षण सम्पन्न

गणेश अधिकारी/पोखरा ।। राष्ट्रिय जनमोर्चा कास्कीले आफ्नो एकमहिने कार्यक्रमअन्तर्गत आज माघ ३ गते रामबजार एरियामा प्रक्षिणात्मक भेला सम्पन्न गरेको छ । राष्ट्रिय जनमोर्चा गण्डकी प्रदेशका अध्यक्ष शङ्कर बराल र अखिल नेपाल युवक सङ्घका केन्द्रीय सदस्य बिक्रम थापाले कार्यक्रममा प्रशिक्षण दिनुभएको थियो । प्रशिक्षणपछि केपी ओली सरकारले चालेको असंवैधानिक, अप्रजातान्त्रिक, अधिनायकवादी र प्रतिगामी तबरले प्रतिनिधि सभा विघटन, सङ्घीयता खारेजी, भ्रष्टाचार अन्त्यको माग राखी रामबजारमा विरोधसभासमेत सम्पन्न भएको थियो । सभालाई नेकपा (मसाल) कास्कीका प्रवक्ता चन्द्रबहादुर केसी, अखिल नेपाल जनजाति सम्मेलनका गण्डकी प्रदेशका अध्यक्ष दिपक गुरुङ र अखिल नेपाल महिला सङ्घकी कास्की जिल्लाध्यक्ष जमुना केसीले सम्बोधन गर्नुभएको थियो । कार्यक्रमको सञ्चालन बिक्रम थापाले गर्नु भएको थियो ।

Yug Darshan पौष २०७७

कञ्चनपुरमा राजमोको विरोधसभा

पुष्कर भट्ट/महेन्द्रनगर । राष्ट्रिय जनमोर्चा केन्द्रीय कार्यालयको निर्देशनअनुसार प्रतिनिधि सभा विघटन गर्ने प्रधानमन्त्री केपी शर्मा ओलीको असंवैधानिक र अप्रजातान्त्रिक कदमको विरुद्ध देशव्यापी रूपमा आयोजित विरोध कार्यक्रमअन्तर्गत आज पुस २० गते कञ्चनपुर जिल्ला महेन्द्रनगरको मदनचोकमा कोणसभा सम्पन्न भएको छ । कार्यक्रमलाई राष्ट्रिय जनमोर्चा केन्द्रीय सदस्य तथा सुदूर पश्चिम प्रदेश अध्यक्ष नन्दराज भट्टले सम्बोधन गर्नुभएको थियो । सो अवसरमा सम्बोधन गर्दै उहाँले प्रतिनिधि सभा विघटन गर्ने कदम असंवैधानिक, अप्रजातान्त्रिक र अधिनायकवादी भएको बताउनुभयो । राजमो नेता भट्टले जननिर्वाचित सरकारको प्रमुखले प्रतिनिधि सभा विघटन गर्ने कार्य गम्भीर गल्ती भएकाले त्यसलाई तत्कालै सच्याउँदै संसद पुनः स्थापना गरिनुपर्ने माग गर्नुभयो । कार्यक्रममा राजमो जिल्लाध्यक्ष रामबहादुर कार्कीले समेत आफ्नो भनाइ राख्नुभएको थियो । कार्यक्रममा नेकपा (मसाल) का जिल्ला प्रवक्ता लक्ष्मी बडु, तराई–मधेश जनवादी मोर्चाका महासचिव राजाराम चौधरी, अखिल (छैठौं) महासचिव महेशराज जोशी, रक्तिमका जिल्ला संयोजक ललित चन्द, वामपन्थी नेता जनक कुँवर, राजमोका जिल्ला सचिव अभिमान थापा, राजमो नगर सदस्य पदम साउद युवा नेता हरि शर्मालगायत नेताहरूको सहभागिता रहेको थियो । राष्ट्रिय जनमोर्चाका जिल्ला सहसचिव लालबहादुर कुँवरले सञ्चालन गर्नुभएको थियो ।

Yug Darshan मंसिर २०७७

प्रधानमन्त्रीको कदमले सहिदको रगतको अवमूल्यन गर्‍याे : भट्ट

धनगढी । राष्ट्रिय जनमोर्चाका केन्द्रीय सदस्य तथा सुदूर पश्चिम इन्चार्ज मनोज भट्टले प्रतिनिधि सभा विघटन गर्ने प्रधानमन्त्री केपी शर्मा ओलीको कदमले सहिदहरुको रगतको अवमूल्यन गरेको बताउनुभएको छ । विघटित प्रतिनिधि सभाको पुनर्स्थापनाको माग गर्दै राजमो कैलालीले सोमबार धनगढीमा आयोजना गरेको विरोध सभालाई सम्बोधन गर्दै नेता भट्टले अप्रधानमन्त्री ओलीको कदम अप्रजातान्त्रिक र असंवैधानिक भएको बताउनुभयो । संसद विघटन गरि वैशाख १७ र २७ गते निर्वाचनको मिति तोक्नु गलत भएको भन्दै उहाँले प्रधानमन्त्रीले संसद विघटन गर्नै नसक्ने जिकीर गर्नुभयो । उहाँले राजमो मात्र नभएर २०६२–२०६३ को जनआन्दोलनमा सहभागि भएका सम्पूर्ण शक्ति पनि अहिले प्रधानमन्त्री ओलीले चालेको कदमका विरुद्धमा भएको भन्दै अहिले सम्पूर्ण जनता एकजुट भएर आन्दोलन गर्नुपर्ने आवश्यकता रहेको बताउनु भयो । नेता भट्टले २०६२–६३ मा सामेल लाखौं लाख जनताको चाहना विरुद्ध प्रधानमन्त्री ओलीले कदम चालेको आरोप लगाउनु भयो । उहाँले अहिलेको संविधानमा बहुमत प्राप्त कसैले पनि संसद भंग गर्ने व्यवस्था नरहेको स्पष्ट गर्नुभयो । राजमो कैलालीले ‘संसद विघटनको विरोध गरौं, राष्ट्रियता, गणतन्त्र र धर्मनिरपेक्षताको रक्षा गरौं, संघीयता र भ्रष्टाचारको बिरोध गरौं’ भन्ने नारासहित धनगढीको पार्क मोडमा विरोधसभा सम्पन्न गरेको हो । कार्यक्रमलाई अखिल नेपाल किसान महासंघका केन्द्रीय सदस्य हरिकृष्ण पाण्डे, अखिल नेपाल जनजाति सम्मेलनका केन्द्रीय सचिव खड्क राना, नेकपा (मसाल) कैलाली जिल्ला प्रवक्ता मिलन शाही, अखिल (छैठौं) का हेमराज भट्टले पनि सम्बोधन गर्नुभएको थियो । कार्यक्रम राजमो जिल्ला सचिवालय सदस्य डबल बोगटीको सञ्चालन तथा जिल्ला सचिव जगत जोशीको अध्यक्षतामा सम्पन्न भएको थियो । राष्ट्रिय जनमोर्चाले प्रतिनिधि सभाको पुनर्स्थापना गर्न माग गर्दै देशब्यापी आन्दोलन गर्दै आएको छ । संसद विघटन भएदेखि नै संघर्षका कार्यक्रम सञ्चालन गर्दै आएको राजमोले देशब्यापी थप कार्यक्रमको घोषणा समेत गरेको छ ।

Yug Darshan मंसिर २०७७