सातामा दुई दिन शनिबार र आइतबार सार्वजनिक बिदा दिने सरकारी निर्णय स्वास्थ्य क्षेत्रमा त्यत्तिकै कार्यान्वयन गरिएमा बिरामीहरू थप मर्कामा पर्नेछन् । एक दिन मात्रै साप्ताहिक बिदा हुँदा त ठूला तथा सुविधासम्पन्न सरकारी अस्पतालहरूमा बिरामीको चाप अत्यधिक छ; शल्यक्रियाका निम्ति पालो पाउन मात्र होइन, कतिपय रोगका लागि बहिरंग सेवा (ओपीडी) लिनसमेत सकस छ । यस्तो अवस्थामा बिनाविकल्प दुई दिन बिदा दिन थालिएमा स्वास्थ्य सेवा झनै प्रवाहित नहुने निश्चित छ । त्यसैले, बिरामीहरूप्रति संवेदनशील भई स्वास्थ्य क्षेत्रमा साबिकको सेवा नबिथोलिने गरी मात्रै बिदासम्बन्धी व्यवस्थापन मिलाइनुपर्छ ।
