नेपाली काँग्रेसको नयाँ नेतृत्व चयनका लागि मतदान शुरु हुँदै

मंसिर २७, काठमाडौं । नेपाली कांग्रेसको १४ औं महाधिवेशन अन्तर्गत नयाँ नेतृत्व चयन गर्न सोमवार विहानदेखि मतदान शुरु हुँदै छ । भृकुटीमण्डप र राष्ट्रिय सभागृहमा प्रतिनिधिहरु भोट खसाल्न लामबद्ध भएका छन् । मतदानका लागि मतपत्र समयमा नआइपुगेकाले मतदानमा भने ढिलाइ भइरहेको  छ । निर्वाचन समितिका अनुसार राष्ट्रिय सभागृहमा २९३ ओटा, भृकुटीमण्डप प्रांगणमा २९३ ओटा बुथ र भृकुटीमण्डपको हलमा ५१४ ओटा बुथ राखिएको छ । महाधिवेशनस्थल राष्ट्रिय सभागृहमा पार्टी केन्द्रीय कार्यसमिति, जनसम्पर्क समिति, भातृ र शुभेच्छुक संघसंस्था, कर्णाली प्रदेश र लुम्बिनी प्रदेशका मतदाताले मतदान गर्नेछन् । प्रदेश नं २ र गण्डकी प्रदेशका मतदाताले भृकुटीमण्डपको प्रांगणमा र प्रदेश १, बाग्मती र सुदूरपश्चिम प्रदेशका महाधिवेशन प्रतिनिधिले भृकुटीमण्डपको प्रदर्शनी हलभित्र मतदान गर्ने छन् । निर्वाचनमा २९ प्रकारका मतपत्रको व्यवस्था गरिएको छ भने सबै मतपत्रका लागि छुट्टाछुट्टै मतपेटिकाको व्यवस्था गरिएको छ । महाधिवेशनबाट सभापति, दुई जना उपसभापति, दुई जना महामन्त्री, आठ जना सहमहामन्त्री निर्वाचित हुनेछन् । केन्द्रीय समितिमा विभिन्न क्लस्टरबाट १२१ जना निर्वाचित हुनेछन् ।