माघ १३, काठमाडौं । साताको अन्तिम कारोबार दिन बजार खुलेको तीन घण्टाको अवधिमा नेशनल लाइफ इन्स्योरेन्सको सर्वाधिक शेयर खरीदविक्री भएको छ ।
कारोबारमा आएका २२३ ओटा धितोपत्रमध्ये नेशनल लाइफ इन्स्योरेन्स कम्पनीको सर्वाधिक धितोपत्र खरीदविक्री भएको हो । सो अवधिसम्ममा कम्पनीको रू. १५ करोड ६५ लाख ३१ हजार बराबरको शेयर खरीदविक्री भएको छ ।
यो समाचार तयार पार्दासम्म कम्पनीको शेयरमूल्य प्रतिकित्ता रू. १ हजार १३८ मा कारोबार भइरहेको छ ।
यो शेयरमूल्य अघिल्लो कारोबार दिनको तुलनामा १८ रुपैयाँले वृद्धि हो । कम्पनीले बिहीवार लाभांश वितरण गर्ने घोषणा गरेसँगै सर्वाधिक शेयर खरीदविक्री भएको हो ।
कम्पनीले आव २०७६/ ७७ को मुनाफाबाट १९ प्रतिशत बोनस शेयर र १ प्रतिशत नगद लाभांश कर प्रयोजनको लागि वितरण गर्ने प्रस्ताव गरेको छ । यो प्रस्ताव बीमा समितिबाट स्वीकृती पाएपछि र कम्पनीको आगामी साधारण सभाबाट पारित भएपछि शेयरधनीले पाउने छन् ।