रोल्पा । बिहीवार राति वर्षापछि आएको पहिरोले रोल्पाको सुनछहरी गाउँपालिका–१ बाछेममा चारओटा घर बगाएको छ । फुलिबनमा पहिरोको उच्च जोखिम भएपछि गतवर्ष बाछेममा सारिएको नयाँ बस्तीमा पनि पहिरो गएको हो । पहिरोले रणबहादुर घर्ती, टेकमाला घर्ती, गजमा घर्ती र मनपुरा घर्तीको घर बगाएको इलाका प्रहरी कार्यालय पोबाङका इन्चार्ज सई सूर्यलाल गुरुङले जानकारी दिए । यस्तै अन्य पाँच घर पनि आंशिक रूपमा क्षति पुग्नुका साथै उच्च जोखिममा रहेको प्रहरीले बताएको छ । दिलबहादुर घर्ती, चिमा घर्ती, धनमाला घर्ती, विजयी घर्ती र दलबहादुर घर्तीको घर उच्च जोखिममा रहेको छ ।
पहिरोले नयाँ बस्ती उच्च जोखिमा रहेकाले रातको समयमा सबै सुरक्षित ठाउँमा रहेकाले मानवीय क्षति हुन नपाएको सुनछहरी गाउँपालिका–१ का वडाध्यक्ष महावीर रानाले बताए ।
प्रदेश सरकारको १५ करोड लगानीमा फुलिबनबाट ४० घर परिवारलाई बाछेमको नयाँ बस्तीमा सारिएको थियो । नयाँ बस्ती पनि पहिरोले बगाएपछि प्रदेश सरकारको लगानी बालुवामा पानी भएको छ । गाउँपालिकाको अन्य ठाउँमा पनि पहिरोको जोखिम भएकाले उक्त ठाउँमा नयाँ बस्ती राखिएको गाउँपालिका अध्यक्ष आशबहादुर पुनको भनाइ छ । भूगर्भविद् र स्थानीयको सुझाव नमानेर उक्त ठाउँमा बस्ती बसाल्दा अहिले यो अवस्था आएको स्थानीयको गुनासो छ । ‘घर बनाउँदा लागेको ऋण तिरेकै थिएन, अब घर पनि रहेन,’ पहिरो पीडित मनपुरा घर्तीले भनिन् । पहिरोले सडक बगाउँदा सुलीचौर–थबाङ सडक पूर्णरूपमा अवरुद्ध भएको छ ।
