चैत १४, काठमाडौं । टक्सार पिखुवाखोला हाइड्रोपावरले प्राथमिक शेयर निष्कासन गर्नका लागि प्रभु क्यापिटल लिमिटेडलाई शेयर निष्कासन तथा विक्री प्रबन्धकमा नियुक्त गरेको छ ।
आइतवार शेयर निष्कासन तथा विक्री प्रबन्धक नियुक्त गर्ने सम्झौतामा कम्पनीको तर्फबाट प्रबन्ध निर्देशक नरेन्द्र बल्लभ पन्त तथा प्रभु क्यापिटल लिमिटेडका तर्फबाट प्रबन्ध निर्देशक दीनेश थकालीेले हस्ताक्षर गरेका छन् ।
कम्पनीले भोजपुर जिल्लाको भोजपुर नगरपालिकास्थित पिखुवा खोलामा टक्सार पिखुवाखोला जलविद्युत् आयोजना निर्माण गरिरहेको छ । ८ मेगावाट क्षमताको आयोजना निर्माण गरिरहेको उक्त कम्पनीले आयोजनाको निर्माण कार्य सम्पन्न गरी २०७८ साल वैशाख १ गतेदेखि नै विद्युतको व्यापारिक उत्पादन गरि नेपाल विद्युत प्राधिकरणलाई विद्युत विक्री गरिरहेकोे छ ।
कम्पनीले जारी पूँजीको ४४ प्रतिशत बराबरले हुन आउने ४७ करोड ५२ लाख रुपैयाँ बराबरको ४७ लाख ५२ हजार कित्ता साधारण शेयर आयोजना प्रभावित, सर्वसाधारण, कर्मचारी तथा सामूहिक लगानी कोषका लागि निष्कासन गर्न लागेको हो ।
