दोर्दीखोला जलविद्युत् कम्पनीले मंगलवारदेखि स्थानीयका लागि आईपीओ निष्कासन गर्ने

वैशाख १२, काठमाडौं । दोर्दी खोला जलविद्युत् कम्पनीले मंगलवारदेखि आईपीओ निष्कासन गर्ने भएको छ । कम्पनीले पहिलो चरणमा आयोजना प्रभावित स्थानीय बासिन्दाहरुका लागि आईपीओ निष्कासन गर्न लागेको हो । कम्पनीले स्थानीयमा जारी पूँजी रू. १ अर्ब ५ करोड ४२ लाख ६० हजार ४०० को १० प्रतिशतले हुन आउने प्रतिशेयर रू. १०० अंकित दरका कुल १० लाख ५४ हजार २६० कित्ता आईपीओ निष्कासन गर्न लागेको हो । कम्पनीले लमजुङ जिल्लाको दोर्दी गाउँपालिकाका बासिन्दाहरुका (साविकको भारते, अर्चलबोट, श्रीभञ्ज्याङ, नौथर पाचोक, ढोडेनी, फलेनी, बन्सार र हिलेटक्सार गाविस) का लागि आईपीओ निष्कासन गरेको हो । स्थानीयले छिटोमा वैशाख २७ गतेसम्म यो आईपीओ खरीदका लागि आवेदन दिन सक्नेछन्। उक्त अवधिभित्र माग बमोजिम आवेदन नपरेमा भने ढिलोमा जेठ ११ गतेसम्म आईपीओ विक्रीमा रहनेछ । आईपीओ खरीदका लागि सिद्धार्थ बैंक, बेसींशहर शाखा लमजुङ, ग्लोबल आइएमई बैंक, सेराबजार, दोर्दी शाखा, कामना विकास बैंक, बेसींशहर शाखा, लमजुङ, मुक्तिनाथ विकास बैंक, बेसींशहर शाखा, लमजुङ र एनएमबि बैंक, बेसींशहर शाखा लमजुङबाट आवेदन दिन सकिने व्यवस्था छ । यी सँगै आस्बा सेवामा सहभागी सम्पूर्ण बैंक तथा वित्तीय संस्था र तिनका शाखा कार्यालयबाट आवेदन दिन सकिनेछ । कम्पनीको शेयर निष्कासन तथा विक्री प्रबन्धकमा सिद्धार्थ क्यापिटल लिमिटेड रहेको छ । यो आईपीओ खरीदका लागि न्यूनतम १० कित्ता देखि अधिकतममा १० लाख कित्तासम्म आवेदन दिन सकिनेछ । कम्पनीको आईपीओलाई इक्रा नेपालले इक्रा एनपी आईआर डबल बी माइनश रेटिङ्ग प्रदान गरेको छ । यसले कम्पनीको दायित्व बहन गर्ने क्षमतामा औषत जोखिम रहेको संकेत गर्दछ ।