रौतहटमा शुक्रबार दुई बेग्लाबेग्लै घटनामा दुईको मृत्यु भएको छ । विद्यार्थी नेताको मोटरसाइकल दुर्घटनामा र एक महिला ढिस्कोले पुरिएर मृत्यु भएको हो । चन्द्रपुरबाट गरुडास्थित घर जाने क्रममा दुर्घटनामा परेर समाजवादी विद्यार्थी युनियन रौतहट जिल्लाका उपाध्यक्ष गरुडा, महम्मदपुरका २५ वर्षीय अभय यादवको मृत्यु भएको प्रहरीले जनायो । यादवले चलाएको २६ प ६३३५ नम्बरको मोटरसाइकल चन्द्रपुर नगरपालिका–९ स्थित बसन्तपुर क्षेत्रमा अनियन्त्रित भएर सडक छेउको विद्युत् पोलमा ठोक्किएको थियो ।
