बैशाख १८, काठमाडौं । नेकपा एमालेका अध्यक्ष केपी शर्मा ओलीले बाग्मती र विष्णुमती नदीलाई पूर्णरुपमा सफा बनाउने एमालेको संकल्प रहेको बताएका छन् ।
अन्तरराष्ट्रिय श्रमिक दिवसको अवसरमा एमाले निकट ट्रेड युनियनले आयोजना गरेको कार्यक्रममा अध्यक्ष ओलीले उक्त कुरा बताएका हुन् ।
'काठमाडौंलाई विश्वकै नमूना राजधानी बनाउने, सफा राजधानी बनाउने र यहाँका बाग्मती र विष्णुमती नदीलाई पूर्ण सफा बनाउने संकल्पका साथ एमालेले काठमाडौं महानगरपालिकाको उम्मेदवार बनाएको छ ।' उनले भने ।
उनले केशव स्थापितको अनुभव र अन्य युवा उम्मेदवारहरुको जोशलाई मिलन गरेर काठमाडौं महानगरपालिकालाई आफ्नो पार्टी समृद्ध बनाउन चाहेको बताए ।
अध्यक्ष ओलीले उम्मेदवार बन्ने इच्छा गर्नु अन्य दलका उम्मेदवारहरुको अधिकारको कुरा भएपनि उनीहरु चर्चा गर्न लायक नभएको पनि बताए ।
अध्यक्ष ओलीले पार्टीको चुनावी घोषणा पत्र र स्थानीय तहको प्रतिवद्धता पत्र लिएर चुनावी प्रचार अभियानलाई तीव्रता दिन पनि पार्टीका नेता, कार्यकर्तालाई निर्देशन दिए । उनले मजदुरहरुको हक, अधिकार सुनिश्चित गर्नका लागि एमाले सदैव तयार रहेको पनि पटकपटक दोहोर्याएका थिए ।
