मंसिर २६, नयाँदिल्ली(भारत) । भारतमा गत २४ घण्टामा ७ हजार ७७४ जनामा कोरोना संक्रमण देखा परेको छ ।
भारतमा अझै पनि ९२ हजार २२८ जना सक्रिय संक्रमित रहेको केन्द्रीय स्वास्थ्य मन्त्रालयले आइतवार जानकारी दिएको छ । यसै अवधीमा कोरोना संक्रमणबाट ३०६ जनाको मृत्यु भएपछि कोरोना शुरु भएबाट हालसम्म ४ लाख ७५ हजार ४३४ जनाको मृत्यु भएको छ ।
गएको २४ घण्टामा भारतमा ८ हजार ४६४ जना कोरोनाबाट मुक्त भएका छन् । यसैसँगै कोरोना शुरु भएयता हालसम्म ३ करोड ४१ लाख २२ हजार ७९५ जना कोरोनाको संक्रमणबाट मुक्त भएका छन् । भारतमा कोरोना भाइरस निको हुने दर ९८ दशमलव ३६ प्रतिशत रहेको बताइएको छ । यो संख्या सन् २०२० को मार्चपछि सबभन्दा बढी भएको पनि बताइएको छ ।
भारतमा कोरोना शुरु भएदेखि हालसम्म ६५ करोड ५८ लाख व्यक्तिको कोरोना परिक्षण भएको छ । यहाँ गत जनवरी १६ बाट कोरोना भाइरसविरुद्ध खोप अभियान शुरु भएको थियो । सो समयदेखि हालसम्म १ अर्ब ३२ करोड ९३ लाख डोज खोप लगाइएको छ । रासस/ एएनआई
