काठमाडौं । नेपाल धितोपत्र बोर्डले जेठ २३ गते दुई कम्पनीलाई आईपीओ निष्कासन गर्न अनुमति दिएको छ । बोर्डले आइएमई लाइफ इन्स्योरेन्स कम्पनी लिमिटेड र अपर लोहोरे हाइड्रोपावर लिमिटेडलाई आईपीओ निष्कासनको लागि अनुमति दिएको हो ।
आइएमई लाइफ इन्स्योरेन्सलाई बोर्डले प्रिमियम मूल्यमा आईपीओ निष्कासनको अनुमति दिएको हो । आइएमई लाइफले १०० रुपैयाँ अंकित मूल्यमा प्रिमियमबापत १३६ रुपैयाँ ९१ पैसा थप गरी प्रतिकित्ता २३६ रुपैयाँ ९१ पैसामा आईपीओ निष्कासन गर्न बोर्डबाट अनुमति पाएको हो ।
यो मूल्यमा आइएमई लाइफले २ अर्ब ७६ करोड ७ लाख ७४ हजार रुपैयाँ बराबरको १ करोड २० लाख कित्ता आईपीओ विक्री गर्नेछ । आइएमई लाइफले ६ लाख कित्ता आईपीओ प्रतिकित्ता १०० रुपैयाँमै कर्मचारीहरूका लागि विक्री गर्ने बोर्डको भनाइ छ । आइएमई लाइफको आईपीओ निष्कासन तथा विक्री प्रबन्धकमा सिभिल क्यापिटल मार्केट लिमिटेड रहेको छ ।
हाल आइएमई लाइफको चुक्तापूँजी २ अर्ब ८० करोड रूपैयाँ रहेको छ । संस्थापकतर्फ ७० प्रतिशत शेयर स्वामित्व कायम रहेको आइएमई लाइफले सर्वसाधारणमा ३० प्रतिशत शेयर विक्री गर्न लागेको हो । आईपीओ विक्रीपछि कम्पनीको चुक्तापूँजी ४ अर्ब रूपैयाँ कायम हुनेछ । कम्पनीले आईपीओ विक्रीबाट प्रिमियमबापत १ अर्ब ५६ करोड ७ लाख ७४ हजार आम्दानी गर्नेछ ।
बोर्डले अपर लोहोरे हाइड्रोपावर कम्पनी लिमिटेडलाई आयोजना प्रभावित स्थानीय र सर्वसाधारणको लागि २४ करोड ९८ लाख ४ हजार रुपैयाँ बराबरको २४ लाख ९८ हजार ४० कित्ता आईपीओ निष्कासन गर्न अनुमति दिएको हो । कम्पनीको शेयर निष्कासन तथा विक्री प्रबन्धकमा एनआईसी एशिया क्यापिटल रहेको छ ।
यो कम्पनीले भने अंकित मूल्यमै आईपीओ निष्कासन गर्नेछ । हाल कम्पनीमा संस्थापकतर्फबाट चुक्ता भएको पूँजी २६ करोड रूपैयाँ रहेको छ । संस्थापकतर्फबाट कम्पनीमा ५१ प्रतिशतशेयर स्वामित्व कायम रहेको छ ।
सर्वसाधारणमा ४९ प्रतिशत आईपीओ विक्रीपछि कम्पनीको चुक्तापूँजी ५० करोड ९८ लाख ४ हजार पुग्नेछ । कम्पनीले दैलेख जिल्लामा ४ मेगावाट क्षमताको माथिल्लो लोहोरे खोला जलविद्युत आयोजना निर्माण गरिरहेको छ ।
