कर्णाली प्रदेश राजधानी वीरेन्द्रनगरको सुर्खेतस्थित काँक्रेविहार ऐतिहासिक कलाकारिताको नमुनाका रूपमा छ । नेपालको ‘दोस्रो लुम्बिनी’को सङ्ज्ञा पाएको काँक्रेविहार विशेषतः हिन्दु र बौद्ध धर्मावलम्बीका लागि महत्त्वपूर्ण मानिन्छ । वीरेन्द्रनगर नगरपालिका–९ मा अवस्थित यो क्षेत्र वीरेन्द्रनगरदेखि तीन किमी दक्षिणमा पर्दछ । सुर्खेत उपत्यकाको बीच भागमा जङ्गलको थुम्कोमा रहेको काँक्रेविहार पुरातात्विक र ऐतिहासिक महत्त्वले भरिपूर्ण छ । २१ मिटर अग्लो शिखरशैलीको मन्दिर निर्माण भएपछि अवलोकन गर्न आउनेको सङ्ख्याका साथै अध्ययन गर्नेहरूका लागि पनि महत्त्वपूर्ण क्षेत्र बनेको छ ।