साउन १५, पेचिङ (चीन) । चिनियाँ दूरसञ्चार उपकरण तथा स्मार्टफोन निर्माता कम्पनी हुवावेईले बिहीवार नयाँ पी५० स्मार्टफोनहरू सार्वजनिक गरेको छ ।
कम्पनी अमेरिकी प्रतिबन्ध र विश्वव्यापी चिप अभावको अवस्थाबीच संघर्षरत रहँदा ल्याइएको यस फोनमा फाइभजी इन्टरनेट चल्दैन । कम्पनीले पी५० र पी५० प्रो गरी दुई ओटा मोडल विक्रीका लागि ल्याउँदैछ ।
हुवावेईको पी सिरिजका फोन उत्कृष्ट क्यामरा प्रविधिका लागि परिचित छ । पी५० मा मुख्य क्यामरा मोडयूलमा तीन ओटा लेन्स छ । तर दुवै फोनमा फाइभजी नेटवर्क चल्दैन, क्वालकमको फोरजी चिपसेट छ ।
पी५० को मूल्य ४ हजार ४८८ युआन (६९५ अमेरिकी डलर) राखिएको छ । पी५० प्रोको मूल्य ५ हजार ९८८ युआन (९२७ अमेरिकी डलर)देखि शुरु छ । दुवै फोनमा हुवावेईको नयाँ अपरेटिङ सिष्टम हार्मोनी ओएस छ । एजेन्सी
