फागुन १६, काठमाडौं । विश्व बजारमा सोमवार कच्चा तेलको भाउ बढेको छ ।
पश्चिमी देशहरुले रुसमाथि एक पछि अर्को गर्दै प्रतिबन्ध कसिलो बनाउँदै गएको र केही रुसी बैंकहरुलाई विश्वव्यापी भुक्तानी प्रणालीमा बन्देज लगाएपछि तेलको भाउले टेवा पाएको हो ।
सोमवार बिहानी कारोबारमा लन्डन स्थित आईसीईको कोमेक्स डिभिजनमा ब्रेन्ट क्रुडको भाउ प्रतिब्यारेल १०५ डलर शून्य ७ सेन्टसम्म उक्लिएको थियो । यो सामाचार तयार पार्दाखेरि नेपाली समयअनुसार साँझ ५ बजेतिर ब्रेन्टको भाउ प्रतिब्यारेल ५ दशमलव शून्य ८ प्रतिशतले बढेर १०२ डलर ९० सेन्ट कायम भएको थियो ।
बिहानी कारोबारमा न्यूयोर्कस्थित न्यूयोर्क मर्कन्टाइल एक्सचेञ्जको कोमेक्स डिभिजनमा अमेरिकी बेञ्चमार्क वेष्ट टेक्सास इन्टरमिडियट (डब्ल्यूटीआई) को भाउ ९९ डलर १ सेन्टसम्म पुगेको थियो । यो सामाचार तयार पार्दाखेरि डब्ल्यूटीआई प्रतिब्यारेल ४ दशमलव ९५ प्रतिशतले बढेर ९६ डलर ३८ सेन्ट कायम भएको थियो ।
केही रुसी बैंकहरुलाई स्वीफ्ट प्रणालीबाट हटाउने अमेरिका र यूरोपको कदमले निकट भविष्यमा आपूर्तिमा केही खालको अवरोध हुने आशंका बढेको बताउँछन्, एएनजेडका कमोडिटी रणनीतिज्ञ डेनियल हायन्स । आपूर्तिमा खतरा केही समय निकै धेरै रहने यो बजारमा आपूर्ति कसिलो भएको समयमा भएकोले पनि भाउ बढ्ने उनको भनाइ छ ।
पश्चिमी देशहरुले रुसमाथि कठोर प्रतिबन्धहरुको घोषणा गरेपछि रुसले तेल देखि अन्न सम्म सबै कमोडिटिजको निर्यातमा चरम अवरोधको सामना गरेको छ । केही रुसी बैंकहरुलाई स्वीफ्ट अन्तरराष्ट्रिय भुक्तानी प्रणालीबाट बहिस्कार गरिएको छ । विश्वको तेल आपूर्तिमा रुसी तेलको अनुपात करीब १० प्रतिशत छ । यसअघिको प्रतिब्यारेल ९५ डलरबाट बढाएर गोल्डम्यान श्याख्सले ब्रेन्ट क्रुडको एक महीनाको मूल्य प्रक्षेपण ११५ ब्यारेलमा पुर्याएको छ ।
रुस प्रमुख उत्पादक भएको कमोडिटिजहरुको भाउ बढ्ने अपेक्षा गरिएको बैंकले बताएको छ । रुसले पछिल्लो समय युक्रेनमाथि जताततैबाट आक्रमण गरिरहेको छ । बेलारुसको सीमामा वार्ता गर्न सोमबार युक्रेनी अधिकारीहरु आइपुगेका छन् । दुई देश बीच वार्ता सफल भयो र आक्रमण स्थगित गर्न दुबै पक्ष तयार भए अनि रुसी सेनाहरु फिर्ता गए भने चाँही शेयर बढ्ने, डलरको भाउ उक्लिने र तेलको भाउमा कमी आउन सक्ने बताउँछन्, ओन्डाका विश्लेषक जेफ्री हेली ।
सोमवार एशियाली शेयर बजार मिश्रीत देखिएका छन् । बजार बन्द हुँदा चीनमा शाङहाई काम्पोजिट शून्य दशमलव ३२ प्रतिशतले बढेको थियो । शेन्चन कम्पोनेन्ट पनि सोही स्तरमा बढेको थियो । हङकङमा भने हाङशेङ शून्य दशमलव २४ प्रतिशत तल आएर बन्द भएको थियो । जापानमा निक्केई २२५ परिसूचक शून्य दशलमव १९ प्रतिशत माथि आएर बन्द भयो । ताइवान, दक्षिण कोरिया, सिंगापुर र भारतीय बजार पनि हरियोमा आएर बन्द भएको थियो ।
इन्डोनेशियामा बजार बन्द थियो भने थाइल्यान्डमा शेयर परिसूचक रातोमा आएर बन्द भएको थियो । यूरोपमा पनि बेलायत, फ्रान्स र जर्मनीमा शेयर बजार रातोमा थिए । यो समाचार तयार पार्दाखेरि बेलायतमा फुट्सी १ दशमलव शून्य ४ प्रतिशतले घटेको थियो । फ्रान्समा क्याक ४० ले २ दशमलव ७५ प्रतिशतको कमी बेहोर्दा जर्मनीमा डीएएक्स २ दशमलव ३२ प्रतिशतले घटेको थियो । एजेन्सीहरुको सहयोगमा
