निर्वतमान अर्थमन्त्री जनार्दन शर्मामाथि छानबिन गर्न बनेको संसदीय विशेष समितिको म्याद थप भएको छ। समितिले पाएको १० दिनको अवधिमा सबै काम नसकिने भएपछि ७ दिनको म्याद थप भएको हो । आज बसेको प्रतिनिधिसभा बैठकमा सभामुख अग्नि सापकोटाले ७ दिन म्याद थपको प्रस्ताव राखेकोमा बैठकले त्यसलाई अनुमोदन गरेको हो । समितिको हिजो बुधबार बसेको समितिको बैठकले ७ दिन म्याद थप गर्न सभामुखलाई आग्रह गर्ने निर्णय गरेको थियो । समितिको म्याद आज साउन ५ गते बिहिबार सकिदै थियो। अब समितिको म्याद १२ गतेसम्म कायम भएको छ।समितिले आज बिहान जनार्दन शर्मासँग ३ घण्टा बयान लिएको छ । त्यस्तै समितिले सिसिटिभी फुटेज नपाएपछि डिलेट भएको भनिएको फुटेज रिकभर गर्न प्रहरीलाई पठाएको छ। बजेट प्रस्तुत गर्ने अघिल्लो दिन जेठ १४ गते अनाधिकृत व्यक्तिलाई मन्त्रालयमा बोलाएर करका दरहरु हेरफेर गराएको समाचार सार्वजनिक भएपछि उनले पदबाट राजीनामा दिएका थिए । उनीमाथि संसदीय समितिले छानबिन गरिरहेको छ । समितिले यसअघि अर्थसचिव मधु मरासिनीसहित अर्थका अन्य अधिकारीसँग पनि बयान लिईसकेको छ । समितिले आज यस बारे समाचार लेख्ने २ जना पत्रकारसँग पनि सोधपुछ गरेको छ । यो पनि : छानबिन समितिमा जनार्दनको ‘३ घण्टे’ बयान, के के भने ?
