मजदूरहरू धमाधम विदेश पलायन भएका कारण पूर्वी नेपालका उद्योगहरूको उत्पादन आधा घटेको छ । त्यसैले दिनमा झण्डै हजार पन्ध्र सय नेपाली युवा विदेश गइरहेको समाचार दिनहुँ आउने गरेको छ । तर, नेपालबाट विदेश जाने वा जान खोज्नेहरू मजदूर मात्र भने होइनन्, किनभने मौका मिल्ने हो भने एक दुई अपवादबाहेक सबै नेपाली विदेशतिरै जान तयार छन् । प्रत्येक वर्ष अमेरिका जान डिभी भर्नेको संख्या हेर्दा पनि यो पुष्टि हुन्छ । हैन, विदेशमा त्यस्तो के हुँदोरहेछ, जसका कारण नेपालका मजदूर, पेशाकर्मी मात्र होइन सरकारी कर्मचारी, सचिवदेखि, मन्त्री, प्रधानमन्त्रीसम्म विदेश जान भनेपछि मरिहत्ते गर्छन् ? धैरे बेरको घोत्ल्याइँपछि नेपालीको विदेशमोहको रहस्य यो लेखकले पत्ता लगाएको छ । त्यसको एक प्रमुख कारण, व्यक्तिगत होस् वा देशको, विभिन्न समस्या सुल्झाउनकै लागि नेपालीहरू विदेशतिर दौडँदा रहेछन् । उदाहरणका लागि, देशमा दूधभात खान नपाएका भारत, खाडी मुलुक, मलेसिया, कोरिया आदि देशतिर दौडँदा रहेछन् । देशमा राम्रोसँग पढ्न नपाएकाहरू अष्ट्रेलिया, बेलायत, अमेरिका आदि देश जाँदा रहेछन् । त्यतिमात्र होइन, देशमा डिस्को र फ्रि–सेक्स नपाएकाहरू त्यसको खोजीमा थाइल्याण्ड र अन्य विकसित देश जाँदा रहेछन् ।
(तीतोमीठोबाट)
वर्ष ६, अंक ७२, शुक्रवार, १७ मंसिर, २०६७
