असार ८, पेचिङ (चीन) । चीनले क्रिप्टोकरेन्सीमाथि कडाई बढाएको छ । बैंक तथा भुक्तानी मञ्चहरुलाई डिजिटल करेन्सीको कारोबारलाई टेवा बन्द गर्न आदेश दिएको छ ।
शुक्रवार भने शिचुआन प्रान्तमा बिट्क्वाइन माइनिङ सञ्चालन बन्द गरिएको थियो । यो खबरपछि वार बिट्क्वाइनको भाउ १० प्रतिशतभन्दा धेरैले घटेको थियो । तर मंगलवार एशियाली कारोबारमा भाउ स्थिर रहेको बीबीसीले समाचारमा भनेको छ ।
अप्रिलमा प्रतिगोटा ६३ हजार डलरमाथि पुगेको बिट्क्वाइनको भाउ अहिले ५० प्रतिशत तल छ । सोमवार चीनको केन्द्रीय बैंक पिपुल्स बैंक अफ चाइना (पीबीओसी) ले आफूले हालै कयौं प्रमुख बैंक र भुक्तानी कम्पनीहरुलाई बोलाएर क्रिप्टोकरेन्सीको कारोबारविरुद्ध कठोर कदम चाल्न भनेको थियो ।
बैंकहरुलाई कारोबार, क्लियरिङ र राफसाफ लगायत सेवाका लागि क्रिप्टोकरेन्सी प्रयोग नगर्न आदेश दिइएको पीबीओसीले एक विज्ञप्तिमा भनेको थियो ।
आफूले पीबीओसीको निर्देशिका मान्ने र क्रिप्टोकरेन्सी माइनिङ र कारोबारमा संलग्न गैरकानूनी गतिविधि हुन नदिन सावधानी अपनाउने सम्पत्तिका आधारमा चीनको तेस्रो ठूलो बैंक एग्रिकल्चरल बैंक अफ चाइनाले भनेको थियो ।
चीनको पोष्टल सेभिङ बैंकले पनि क्रिप्टोकरेन्सीमा कुनै पनि कारोबारलाई सहजीकरण नगर्ने बताएको थियो ।
मोबाइल तथा अनलाइन भुक्तानी मञ्च अलिपेले पनि गैरकानूनी रुपमा हुने क्रिप्टोकरेन्सी कारोबार पत्ता लगाउन निगरानी प्रणाली स्थापना गर्ने बताएको छ ।
गत वर्ष विश्वको कुल बिट्क्वाइन उत्पादनमा चीनको अनुपात ६५ प्रतिशत रहेको थियो । गत महीना चीनको मन्त्री परिषद्ले वित्तीय जोखिम न्यूनीकरण गर्न क्रिप्टोकरेन्सी माइनिङ र कारोबारमा रोक लगाउने बताएको थियो । एजेन्सी
