‘निर्मला पन्तको बलात्कारी खै ?’ लेखेको टिसर्ट लगाउने युवाहरु पक्राउ

धनगढी । प्रधानमन्त्री केपी शर्मा ओलीले सम्बोधन गरेको सभामा ‘निर्मला पन्तका बलात्कारी खोई ?’ लेखेको टिसर्ट लगाउने युवाहरु पक्राउ परेका छन् । धनगढीस्थित खुला मञ्चमा आयोजना भएको नेकपा ओली समूहको जनसभाबाट युवाहरुलाई प्रहरीले नियन्त्रणमा लिएको हो । सभाको सुरक्षामा खटिएको सशस्त्र प्रहरीले ६ जना युवकलाई नियन्त्रणमा लिएर जिल्ला प्रहरी कार्यालयको जिम्मा लगाएको हो ।  दुई वर्ष अघि २०७५ साउन ११ गते महेन्द्रनगरको निम्बुखेडास्थित उखुबारीमा १३ वर्षीया बालिका निर्मला पन्तको शव बलात्कारपछि हत्या गरेको अवस्थामा फेला परेको थियो । बलात्कार र हत्या प्रकरणको अनुसन्धान हालसम्म चलिरहेको छ। उनीहरुले निर्मलाको बलात्कार गरी हत्या भएको २ वर्ष बित्दा पनि सरकार मौन रहेको भन्दै विरोध जनाएका थिए । हामीलाई गालीगलौज गर्ने फुर्सद छैनः प्रधानमन्त्री ओली सभालाई सम्बोधन गर्दै प्रधानमन्त्री ओलीले प्रचण्ड–नेपाललाई आफूहरुलाई गालीगलौज गर्ने फुर्सद नभएको दाबी गर्नुभयो । देश बनाउने सरकारको प्राथमिकता भएको उल्लेख गर्दै ओलीले गालीगलौज गर्न फुर्सद नभएको ओलीको भनाई थियो । प्रचण्ड–माधवकुमार नेपालसँग मुखमुखै लाग्न, दन्तबझान गर्ने फुर्सद नभएको ओलीको भनाई थियो । ‘बाटामा गएर मुख छाडेको छ, सभ्यता केही छैन । हामीलाई उहाँहरूसँगै गालीगलौज गर्न, दन्तबझान गर्ने फुर्सद छैन । देश बनाउनु छ’ ओलीले भन्नुभयो ।