काठमाडौं । प्रधानमन्त्री केपी शर्मा ओलीले भारतसँग समानताको आधारमा मित्रता गर्न चाहेको बताउनुभएको छ । उहाँले भारत र नेपालबीचको सम्बन्ध कुनै बडेभाइ र छोटेभाइको जस्तो नभइ समान सार्वभौमसत्ता सम्पन्न देशको सम्बन्ध भएको पनि स्पष्ट पार्नुभएको छ ।
सोमबार साँझ भारतीय टेलिभिजन च्यानल जीन्युजलाई अन्तर्वार्ता दिँदै प्रधानमन्त्रीओलीले जनसंख्या र भूगोलमा नेपालभन्दा भारत ठूलो भएपनि सार्वभौमिता बराबरी हुने बताउनुभयो । प्रधानमन्त्री ओलीले दुई सार्वभौम देशका प्रधानमन्त्रीको हैसियत सानो र ठूलो देशको नभइ समान हैसियत भएको पनि स्पष्ट पार्नुभयो ।
ओलीले नेपाली भूमि कालापानी, लिपुलेक र लिम्पियाधुरा समेटेर भारतले नक्सा सार्वजनिक गरेपछि त्यसबारे कूटनीतिक नोट पठाएको जानकारी दिँदै त्यसको वेवास्ता गरेर भारतले सडक उद्घाटन गरेको बताउनुभयो । कालापानी लगायतको क्षेत्र नेपाली भूमी भएको स्पष्ट सन्देश दिँदै प्रधानमन्त्रीले वार्ताका माध्यमबाट समस्या समाधान गर्न नेपाल तयार रहेको पनि बताउनुभयो ।
ओलीले नेपाल कुनै पनि देशको साथमा लागेर अर्को देश विरुद्ध आफ्नो जमिन वा आकास प्रयोग गर्न नदिने पनि स्पष्ट पार्नुभयो । उहाँले नेपाल भारत र चीनलाई फरक ढंगले व्यवहार गर्ने नभइ पञ्चशीलको सिद्धान्तका आधारमा व्यवहार गर्ने र असंलग्न परराष्ट्र नीति अंगिकार गरिरहेको बताउनुभयो ।
प्रधानमन्त्री ओलीले भारत र चीन दुवै देशमा शान्ति कायम भएमा नै नेपाल पनि सुरक्षित हुने बताउनुभयो । उहाँले दुई ठूला हात्ती आपसमा लडेपनि र माया गरेपनि बारीको नोक्सान हुने उदाहरण दिँदै भारत र चीन लडेमा नेपालले नोक्सान व्यहोर्नुपर्ने बताउनुभयो । यदी दुवै देशले चाहेमा आफू वार्ताका लागि मध्यस्थता गर्न तयार रहेको प्रधानमन्त्री ओलीको भनाई थियो ।
