प्रधानमन्त्री निर्वाचनको एघारौं शृङ्खलाको पटाक्षेप भएको छ । एक्ला उम्मेदवार नेपाली कांग्रेसका रामचन्द्र पौडेलले १ सय ४ मत पाएर एघारौं पटक पराजयको सामना गरे । संविधानसभामा उपस्थितमध्ये ४० सभासद तटस्थ बसे । प्रमको अर्को निर्वाचन असोज २ गते आइतवारलाई तोकिएको छ । निर्वाचनको यो शृङ्खलालाई नेपालका बुद्धिजीवी र राजनीतिशास्त्री ‘ननसेन्स’ र ‘लज्जास्पद’ भनिरहेका छन् ।
प्रधानमन्त्रीको यो अन्त्यहीन निर्वाचनलाई प्रा. कृष्ण खनाल ‘ननसेन्स’ प्रक्रिया भन्छन् । नेपालका राजनीतिकहरूको यो प्रवृत्तिले मुलुकलाई नै लज्जास्पद स्थितिमा पुर्याएको बताउँदै खनालले भने, ‘अब त यो विषयमा कुरा गर्नै मन छैन, शरम लाग्छ । हामीले बोलेर के हुन्छ ? कसैले सुन्दैन, भो, केही नबोलौं, सरी ।’ उता संवैधानिक समितिका सभापति नीलाम्बर आचार्य भने राजनीतिक दलहरूले जसरी भए पनि सहमतिमा नपुगी सुखै नपाउने बताउँछन् । नेपाली कांग्रेस पनि अन्तिममा सहमतिमा आउने पर्नेमा जोड दिँदै आचार्य भन्छन्, ‘प्रमको उम्मेदवारी फिर्ता लिनुभन्दा पहिले ठूला दलहरू सहमतिमा पुग्नैपर्छ ।’
वर्ष ६, अंक ३१, शुक्रवार, २२ असोज २०६७
