जेठ १६, काठमाडौं । साताको पहिलो कारोबार दिन सोमवार नेप्से परिसूचक ५० दशमलव ३३ अंक घटेर बन्द भएको छ ।
यो दिन नेप्से परिसूचक २ हजार १७३ दशमलव ४४ विन्दुमा झरेको हो । यो दिन कारोबारमा आएका २२७ धितोपत्रको ३४ लाख ५६ हजार ५२९ कित्ता शेयर २६ हजार ९४९ पटकमा रू. १ अर्ब ३३ करोड ८८ लाख ५६ हजार २८२ बराबरको शेयर खरीदविक्री भएको छ ।
बजेटमा एनआरएनको लगानी भित्र्याउने, वैदेशिक रोजगारीमा गएका नेपालीलाई आईपीओमा १० प्रतिशत आरक्षण दिने, बीमा तथा लघुवित्तहरुको पहुँच लगायतका कार्यक्रमहरु आएका छन् । यसले पूँजी बजार विकास विस्तारमा सहयोग पुग्ने देखिन्छ । यद्धपि पछिल्लो समय बजार घट्दो ट्रेण्डमा रहेको छ । धेरै कम्पनीहरुको शेयरमूल्य न्यून विन्दुमा आएको छ ।
यस्तो अवस्थामा लगानीको अवसर पनि हुने गर्दछ । सोही कारण लगानीकर्ताले लगानी गर्नुपूर्व कम्पनीको आधारभूत पक्ष र प्राविधिक पक्ष राम्रोसँग हेरेर लगानी गरेमा राम्रो प्रतिफल प्राप्त हुने देखिन्छ ।
यस दिन कारोबारमा आएका २२७ ओटा धितोपत्रमध्ये बलेफी हाइड्रोपावर कम्पनीको शेयरमूल्यमा सकारात्मक सर्किट लागेको छ । कम्पनीको शेयरमूल्य अघिल्लो कारोबार दिनको तुलनामा सोमवार ९ दशमलव ९९ प्रतिशत वृद्धि भएसँगै सकारात्मक सर्किट लागेको हो । कम्पनीको शेयरमूल्य प्रतिकित्ता रू. १२४ दशमलव ४० कायम भएको हो । त्यसैगरी दोस्रोमा उपकार लघुवित्त वित्तीय संस्थाको शेयरमूल्य ८ दशमलव २३ प्रतिशत बढेर रू. १ हजार ३६३ दशमलव ६० पुगेको छ ।
सोमवार नेपाल इन्भेष्टमेण्ट बैंकको शेयरमूल्यमा नेगेटिभ सर्किट लागेको छ । कम्पनीको शेयरमूल्य अघिल्लो कारोबार दिनको तुलनामा ९ दशमलव ९९ प्रतिशत घटेसँगै नेगेटिभ सर्किट लागेको हो । कम्पनीको शेयरमूल्य प्रतिकित्ता रू. ३६७ दशमलव ७० मा झरेको छ । कम्पनीको मर्जरका कारण दोस्रो बजारमा कारोबार लामो समयसम्म रोकिएको थियो । सोमवारदेखि शेयर कारोबार फुकुवा भएको हो । फुकुवा भएकै दिन कम्पनीको शेयरमा विक्रेता हावी भएसँगै शेयरमूल्य घटेको हो ।
शेयरमूल्य घट्ने दोस्रोमा ज्योति लाइफ इन्स्योरेन्स रहेको छ । उक्त कम्पनीको शेयरमूल्य ७ दशमलव ३६ प्रतिशत घटेर रू. ४०३ कायम भएको छ । त्यसैगरी सोमवार सर्वाधिक शेयर खरीदविक्री नेपाल दूरसञ्चार कम्पनीको भएको छ । कम्पनीको रू. ४ करोड ९६ लाख बराबरको शेयर खरीदविक्री भएको हो । कम्पनीको शेयरमूल्य प्रतिकित्ता रू. ९३५ कायम भएको छ ।
त्यसैगरी सर्वाधिक शेयर खरीदविक्री गर्ने दोस्रोमा अरुण भ्याली हाइड्रोपावरको रू. ४ करोड ४१ लाख बराबरको भएको हो । कारोबारमा आएका १३ ओटै समूहत परिसूचक घटेसँगै समग्र नेप्से परिसूचक घटेको हो ।
समूहगत परिसूचक घट्नेमा बैंकिङ समूहको परिसूचक २ दशमलव शून्य ३ प्रतिशत, विकास बैंक समूहको २ दशमलव ५६ प्रतिशत, वित्त समूहको २ दशमलव ४३ प्रतिशत, होटल एण्ड टुरिजम समूहको १ दशमलव ३८ प्रतिशत, हाइड्रोपावर समूहको २ दशमलव ६३ प्रतिशत, लगानी समूहको २ दशमलव २२ प्रतिशत, जीवन बीमा समूहको २ दशमलव ८५ प्रतिशत, उत्पादन तथा प्रशोधन समूहको २ दशमलव ३७ प्रतिशतका दरले घटेको छ ।
यसैगरी लघुवित्त समूहको १ दशमलव ५७ प्रतिशत, म्युचुअल फण्ड समूहको २ दशमलव ११ प्रतिशत, निर्जीवन बीमा समूहको २ दशमलव ६३ प्रतिशत, अन्य समूहको २ दशमलव ८५ प्रतिशत र व्यापार समूहको समूहगत परिसूचक ३ दशमलव २२ प्रतिशतका दरले घटेको छ ।
