जेठ १९, चितवन । यस जिल्लामा संक्रमणको दर र जोखिम नघटेपछि जेठ २७ गते राति १२ बजेसम्म निषेधाज्ञा थप गर्ने निर्णय भएको छ ।
जिल्ला कोभिड–१९ संकट व्यवस्थापन केन्द्र (डीसीसीएमसी) ले एक साता निषेधाज्ञा थप्न सिफारिस गरेपछि जिल्ला प्रशासन कार्यालय चितवनले आदेश जारी गरी निषेधाज्ञा थप गर्ने निर्णय गरेको हो ।
दोस्रो पटक थप गरिएको निषेधाज्ञाको अवधि बिहीवार रातिबाट सकिंदैछ । कोरोना संक्रमण दर घट्दै गएपनि जिल्लामा संक्रमणको जोखिम कायम रहेको भन्दै जिल्ला प्रशासनले निषेधाज्ञाको अवधि थप गरिएको जानकारी दिएको छ ।
जिल्ला प्रशासन कार्यालय चितवनले गत वैशाख १६ गतेरातिदेखि लागू हुने गरी वैशाख मसान्तसम्म निषेधाज्ञा जारी गरेको थियो । लगत्तै जेठ १३ गते राती १२ बजेसम्म लागू हुने गरी निषेधाज्ञा लम्ब्याइएको थियो ।
कोरोना संक्रमणको दर अझै नघटेपछि पुनः २० गते राति १२ बजेसम्म लागू हुने गरी थप गरिएको थियो । प्रमुख जिल्ला अधिकारी प्रेमलाल लामिछानेद्वारा हस्ताक्षरित आदेशमा कोभिड संक्रमण रोकथामका लागि सबै नागरिकलाई निषेधाज्ञाको पूर्ण पालना गरी सहयोग गर्नसमेत आग्रह गरिएको छ ।
जारी निषेधाज्ञाभन्दा बिहीवारबाट लागू हुने निषेधाज्ञामा खाद्यवस्तुका पसलको हकमा भने केही खुकुलो गरिएको छ ।
