म्याग्दी । म्याग्दीको मंगला गाउँपालिका–५ हाँडेभिरमा पालिकास्तरीय अस्पतालको भवन निर्माण थालिएको छ । संघीय सरकारको सबै पालिकामा आधारभूत तहको अस्पताल सञ्चालन गर्ने योजनानुसार मंगलाको केन्द्र बाबियाचौरसँगै रहेको हाँडेभिरमा भवन निर्माण हुन लागेको हो ।
मंगला गाउँपालिकाका इञ्जीनियर सुजन पौडेलले १० शøया क्षमताको अस्पतालका लागि एक हजार १२४ दशमलव ६४ वर्गमिटर क्षेत्रफलमा दुई भवन निर्माण थालिएको जानकारी दिए ‘आकस्मिक, अन्तरंग, बहिरंग, प्रयोगशाला, प्रशासनिक, औषधि भण्डारण, उपचारका लागि छुट्टाछुट्टै कक्षसहितको भूकम्प प्रतिरोधी क्षमताको अपांगतामैत्री भवन बनाउन लागिएको हो,’ उनले भने, ‘आगामी २०८० असारसम्म भवन निर्माण सम्पन्न गर्ने लक्ष्य छ ।’
भवन निर्माणका लागि ओमबुद्ध इन्टरनेशनल कन्स्ट्रक्शन काठमाडौंसँग २०७८ असारमा ९ करोड ११ लाखमा ठेक्का सम्झौता गरिएको थियो । भवनको कुल १२ करोड ९७ लाख लागत अनुमान गरिएको छ । प्रमुख प्रशासकीय अधिकृत मनोहर ढुंगानाका अनुसार दुई भवनमा ३५ कोठा निर्माण गरिनेछ । २०७७ पुस १५ गते सो अस्पताल भवनको गाउँपालिकाका अध्यक्ष शतप्रसाद रोकाले शिलान्यास गरेका थिए ।
अस्पतालका लागि अर्मन स्वास्थ्यचौकी परिसरमा तीन वर्षअघि आठ रोपनी जग्गा व्यवस्थापन गरिएको थियो । मंगलाका साथै म्याग्दीको अन्नपूर्ण र धवलागिरि गाउँपालिकाले पनि आधारभूत अस्पताल भवन निर्माण शुरू गरेका छन् । रासस
