महामारीको मारमा डन्डी उद्योग : बारा–पर्सा कोरिडोरका अधिकांश ठूला उद्योगको उत्पादन बन्द

वीरगञ्ज । बारा पर्सा औद्योगिक कोरिडोरका अधिकांश ठूला रड (डन्डी) उद्योगको उत्पादन बन्द भएको छ । उद्योगलाई चाहिने अक्सिजनको अभावमा यस्ता उद्योगको उत्पादन बन्द भएको उद्योगीहरूले बताएका छन् । कोरोना महामारीको दोस्रो लहरमा संक्रमित र गम्भीर बिरामी बढेपछि अहिले अक्सिजनको आपूर्ति बिरामीको उपचारमा केन्द्रित गरिएको छ । सरकार र निजीक्षेत्र दुवैले उद्योगको आपूर्ति रोकेरै भए पनि संक्रमितको उपचारमा अक्सिजन पठाउन आग्रह गरेका छन् । कारोना संक्रमितको उपचारमा अक्सिजनको अभाव हुन थालेपछि उद्योगमा अक्सिजन आपूर्ति बन्द गरिएको थियो । सरकारले स्थानीय प्रशासनलाई पत्राचार गरी उद्योगमा आपूर्ति रोकेर भए पनि अस्पतालमा पठाउन निर्देशन दिएको थियो । बारा र पर्सा जिल्ला प्रशासनले अक्सिजन उद्योगहरूलाई पत्रमार्फत औद्योगिक उत्पादनका लागि अक्सिजन आपूर्ति नगर्न भनेका छन् । अक्सिजन बढी खपत गर्ने फलाम डन्डी उद्योगहरू प्रभावित भएको उद्योगीहरूले बताएका छन् । बाराको सिमरास्थित जगदम्बा स्टीलले उत्पादन बन्द गरेको छ । दैनिक २ हजार मेट्रिकटन डन्डी उत्पादन गर्दै आएको जगदम्बाले अक्सिजन अभावमा २ सातादेखि उत्पादन रोकेको उद्योगका सञ्चालक पवन गुप्ताले जानकारी दिए । गुप्ताका अनुसार कोरिडोरका अधिकांश ठूला उद्योगले उत्पादन बन्द गरेका छन् । बारा र पर्सामा एक दर्जनभन्दा बढी यस्ता उद्योग छन् । वीरगञ्ज उद्योग वाणिज्य संघका अध्यक्ष सुबोधकुमार गुप्ताले पनि अक्सिजन अभावमा डन्डी उद्योगहरूको उत्पादन प्रभावित भएको बताए । ‘अहिलेको महामारीमा निजीक्षेत्रले समेत कोराना संक्रमितको उपचारमा अक्सिजनको आपूर्ति केन्द्रित गर्न आग्रह गरेको अवस्था हो । संक्रमण सामान्यीकरण हुँदै गएपछि जतिसक्दो चाँडो उद्योगतर्पmको आपूर्तिलाई पनि सहजीकरण गरिँदै जानुपर्छ,’ अध्यक्ष गुप्ताले भने । फलाम उद्योगमा अक्सिजन बढी खपत हुन्छ । फलाम काट्न अक्सिजन प्रयोग हुन्छ । उत्पादन क्षमताका आधारमा एउटा उद्योगले दैनिक ५ देखि ५० सिलिन्डरसम्म अक्सिजन खपत गर्ने उद्योगीको भनाइ छ । फलाम प्रयोग हुने अन्य निर्माणका काम पनि प्रभावित भएको उद्योगीहरूको भनाइ छ । बारा र पर्साका तीनओटा अक्सिजन उद्योग छन् । यी सबै उद्योगले अहिले अस्पतालमा अक्सिजन आपूर्ति गरिरहेका छन् । संक्रमितको उपचार सहज बनाउन उद्योगमा अक्सिजन आपूर्ति रोकिएको पर्साका सहायक प्रमुख जिल्ला अधिकारी भीमकान्त पौडेलले बताए । सीमित परिमाणमा आपूर्ति भए पनि धेरै अक्सिजन चाहिने उद्योगलाई अहिले दिन नसकिएको पौडेलको भनाइ छ । ‘उद्योगको उत्पादनभन्दा मानिसको ज्यान जोगाउने काम प्राथमिक हो । अहिले त्यसैअनुसार आपूर्ति भइरहेको छ,’ जिल्ला प्रशासन कार्यालय पर्साका सूचना अधिकारीसमेत रहेका पौडेलले बताए ।