चालू आर्थिक वर्षमा विदेशी मुद्रा लगानीबाट नेपालले प्राप्त गर्ने प्रतिफल घटेको छ । विदेशी मुद्राको सञ्चिति घटेकाले पनि प्रतिफल घटेको हो । चालू आर्थिक वर्षको दश महिनामा नेपाल राष्ट्र बैंकले विदेशी मुद्रामा गरेको लगानीबाट रू. २ अर्ब खुद प्रतिफल प्राप्त गरेको छ । ‘विदेशी मुद्रा सञ्चिति सामान्य अवस्थामा रहेको समयमा यस्तो प्रतिफल रू. ३ अर्बभन्दा बढी हुने गरेको थियो,’ राष्ट्र बैंक उच्च स्रोतले भन्यो ।
हाल राष्ट्र बैंकसँग रू. ३ अर्ब अमेरिकी डलर बराबरको विदेशी मुद्रा र रू. २४ करोड भारतीय रुपैयाँ सञ्चिति रहेको छ । बैंकसँग भएको विदेशी मुद्राको सञ्चितिका आधारमा प्राप्त प्रतिफल एक प्रतिशत भन्दा पनि कम रहेको छ । यस वर्ष विदेशी मुद्राको सञ्चिति घट्नुको मुख्य कारण अत्यधिक मात्रमा सुनको आयात हुनु भएको बैंकको दाबी छ ।
राष्ट्र बैंकले अमेरिकी डिलर, पाउन्ड स्टर्लिङ, युरो, अस्ट्रेलियन डलर तथा सुनमा समेत विदेशी मुद्राको सञ्चिति गर्ने गर्छ । बैंकले अन्तर्राष्ट्रिय मुद्रा कोषको आधिकारिक मुद्राको रूपमा चिनिने स्पेशल ड्रोइङ राइटलाई पनि आफ्नो विदेशी सम्पत्तिको रूपमा राख्ने गर्छ । उसले विभिन्न हङकङ सांघाइ बैंकिङ कर्पोरेसन, स्टान्डर्ड चार्टर्ड, बैंक अफ इङ्ल्यान्ड, फेडरल रिजर्भजस्ता अन्तर्राष्ट्रिय बैंकहरूमा विदशी मुद्रा राख्ने गर्छ ।
अंक ४५, २०६७, असार २८– साउन २
