काठमाडौं । एक अर्ब २६ करोड १९ लाख रूपैयाँ बिगो दाबीसहित विशेष अदालतमा दायर भएको भ्रष्टाचार मुद्दामा कर्मचारी र सिमेन्ट उद्योगीले विशेष अदालतबाट शुक्रवार सफाइ पाएका छन् । गत वर्ष माघमा अख्तियार दुरुपयोग अनुसन्धान आयोगले खानी तथा भूगर्भ विभागका तत्कालीन महानिर्देशक रामप्रसाद घिमिरेसहित ९ कर्मचारी र ९ ओटा सिमेन्ट तथा चुनढुंगा उद्योगविरूद्ध मुद्दा दायर गरेको थियो ।
न्यायाधीशहरू खुशीप्रसाद थारू, रमेशकुमार पोखरेल र बलभद्र बास्तोलाको संयुक्त इजलासले शुक्रवार उनीहरूलाई सफाइ दिएको हो । खानी दोहन गरी अर्बाैं रूपैयाँ राजस्व गुमेको पुष्टि हुँदा पनि उद्योगहरूलाई उन्मुक्ति दिएको र यसबाट उक्त रकम भ्रष्टाचार गरेको दाबी गर्दै आयोगले विशेष अदालत काठमाडौंमा मुद्दा दायर गरेको थियो । खानी उत्खनन अनुमतिपत्रमा अनुमति दिएको परिणामभन्दा बढी चुनढुंगा उत्खनन गरेको भन्दै आयोगले ९ उद्योग र तिनका सञ्चालकविरुद्ध पनि मुद्दा दायर गरेको थियो ।
ती उद्योगहरूमा सर्वोत्तम सिमेन्ट, सिद्धार्थ मिनरल्स प्रालि, मारूती सिमेन्टस्, अन्नपूर्ण क्वेरिज प्रालि, उदयपुर मिनरल्स टेक प्रालि, युनाइटेड सिमेन्ट, सोनापुर मिनरल्स एन्ड आयल लिमिटेड, कञ्चन क्वेरिज प्रालि र डोलोमाइट चुनढुंगा उद्योग प्रालि थिए । सर्वाेत्तमका सञ्चालक विष्णुप्रसाद न्यौपानेविरूद्ध १६ करोड ३१ लाख रूपैयाँको बिगो दाबी गरिएको थियो । सिद्धार्थका पशुपति मुरारकाविरूद्ध ४९ करोड ४५ लाख रूपैयाँ, मारूतीका शरद गोयलविरूद्ध २० करोड ५० लाख रूपैयाँ बिगो दाबी गरी मुद्दा दायर गरिएको थियो । यसैगरी आयोगले अन्नपूर्ण क्वेरिजका सञ्चालक ऋषि अग्रवालसँग ११ करोड १७ लाख, उदयपुर मिनरल्सका सञ्चालक प्रवलजंग पाण्डेविरूद्ध १ करोड ७९ लाख रूपैयाँ, युनाइटेडका सञ्चालक नरेश दुगडविरूद्ध ९ करोड ६९ लाख रूपैयाँ, सोनापुरका सञ्चालक दिपेश तायलविरुद्ध ६ करोड ९८ लाख रूपैयाँ, कञ्चन क्वेरिजका सञ्चालक भिमबहादुर थापा क्षेत्रीविरुद्ध ३ करोड ८ लाख रूपैयाँ र डोलोमाइट चुनढुंगाका सञ्चालक मानबहादुर श्रेष्ठविरूद्ध ५ करोड ४३ लाख रूपैयाँ बिगो माग गरिएको थियो ।
यस्तै आयोगले महानिर्देशक घिमिरेसहित सुपरिटेन्डेन्ट माइनिङ इन्जिनियर जयराम घिमिरेविरूद्ध मुद्दा दायर गरेको थियो । कर्मचारीहरूमा उपसचिव (कानून) सपना अधिकारी, उपन्यायाधिवक्ता चन्द्रकुमार पोखरेल, सिनियर डिभिजनल माइनिङ इन्जिनियर प्रशान्त बोहोरा, सिनियर डिभिजनल जियोलोजिस्ट धर्मराज खड्का, लेखा अधिकृत श्रीभद्र गौतम, रिसर्च अधिकृत बसन्त अधिकारी र जियोलजिस्ट डा. सौनक भण्डारीविरुद्ध भ्रष्टाचार मुद्दा दायर गरेको थियो ।
