संस्थापक शेयरधनीले खरीद गर्न पाउने गरी तीन कम्पनीको संस्थापक शेयर विक्रीमा

काठमाडौं । एक वाणिज्य बैंकसहित तीन कम्पनीको संस्थापक शेयर शुक्रवारबाट विक्रीमा राखिएका छन् । सांग्रिला डेभलपमेन्ट बैंकको २ हजार कित्ता, सानिमा बैंकको ६८ हजार कित्ता र किसान लघुवित्त वित्तीय संस्था लिमिटेडले १३ हजार ९९४ कित्ता संस्थापक शेयर विक्रीमा राखिएका हुन् । ती शेयर विद्यमान संस्थापक शेयरधनीले मात्र खरीद गर्न पाउने छन् । तीन कम्पनीमध्ये सानिमा बैंकले शेयरको मूल्य प्रतिकित्ता १५० रुपैयाँ तोकेको छ । अन्य दुई कम्पनीले भने मूल्य खुलाएका छैनन् । ती शेयर खरीद गर्न इच्छुक विद्यमान संस्थापक शेयरधनीले आगामी ३५ दिनभित्र तोकिएको मूल्य वा सोभन्दा बढी मूल्य अंकित गरी बोलकबोल गर्नुपर्नेछ । सानिमा बैंकको शेयर खरीद गर्नका लागि काठमाडौंको नक्सालस्थित केन्द्रीय कार्यालयमा, किसान लघुवित्तको शेयर खरीदका लागि कैलाली र सांग्रिला डेभलपमेन्ट बैंकको शेयर खरीदका लागि काठमाडौंको बालुवाटारस्थित केन्द्रीय कार्यालयमा आवेदन पेस गर्नुपर्नेछ । तोकिएको अवधिभित्र विद्यमान संस्थापक शेयरधनीबाट आवेदन प्राप्त नभएमा अन्य व्यक्ति तथा संस्थामा ती शेयर विक्री गरिने जानकारी कम्पनीहरूले दिएका छन् ।