असामान्य परिस्थिति वा परिस्थितिजन्य बाध्यताले जन्मिएको हो– वर्तमान सरकार । आमनेपाली जनताले प्रतिपक्षमा बस्ने जनादेश दिएको थियो नेपाली काँग्रेसलाई । गणितीय हिसाबले सरकारको नेतृत्व गर्न असम्भव भएको तीतो यथार्थ हो । आमजनताले प्रतिपक्षमा बस्न दिएको आदेशबमोजिम तोडफोड वा कुनै दिन संसद् अवरोध नगरी रचनात्मक ढङ्गले संसद्मा प्रस्तुत हुँदै आएको प्रतिपक्ष । यसो हुँदाहुँदै पनि संसद्मा उपस्थित पार्टी र बहुमत सांसदको आग्रहमा संवैधानिक सर्वोच्चताको रक्षार्थ मिलिजुली सरकारको नेतृत्व गर्न बाध्य भयो काँग्रेस । केपी ओलीको निरङ्कुश हिटलरी शैलीलाई राष्ट्रपतिले लालमोहर लगाएपश्चात् बहुमत सांसद संवैधानिक सर्वोच्चता कायम गर्न भन्दै सर्वोच्च अदालतको ढोका ढक्ढक्याउन पुगे । सर्वोच्चले न्याय र संविधानको पक्षमा दिएको फैसलाकै परिणाम थियो– शेरबहादुर देउवा नेतृत्वको सरकार ।
