दार्चुला । २०७० सालको बाढीपछि निर्माण शुरू भएको दार्चुला सदरमुकाम खलंगा क्षेत्रको तटबन्ध निर्माण अझै सकिएको छैन । साढे चार किलोमिटर तटबन्ध निर्माणका लागि पटक पटक म्याद थप गरिए पनि अझै अपूरो रहेको हो । जिल्लाको लेकम गाउँपालिकाको लालीदेखि व्यास गाउँपालिकाको छाङरुसम्म समेट्ने उक्त आयोजनाको अन्य क्षेत्रमा काम भए पनि सदरमुकामको दुईओटा प्याकेजमा भने बाँकी छ ।
सदरमुकाम खलंगा क्षेत्रको प्याकेज नं १८ र १९ मा अझै काम हुन नसकेको आयोजनाका सूचना अधिकारी इञ्जिनीयर स्मित श्रेष्ठले बताए । चालू आर्थिक वर्षको पहिलो चौमासिकसम्म निर्माण सुस्त छ । गतवर्ष नै ठेक्का लागेका यी दुवै ठाउँमा यही साता आगामी चैत ३० गतेसम्मलाई म्याद थप गरिएको थियो ।
दुवै ठाउँको प्रगति पनि निराशाजनक छ । इञ्जिनीयर श्रेष्ठका अनुसार प्याकेज नं १८ रहेको सदरमुकाम पुलघाटमा २२ प्रतिशत र प्याकेज नं १९ रहेको श्रीवड क्षेत्रमा चार प्रतिशत मात्र प्रगति देखिएको छ । प्याकेज नं १८ मा गतवर्ष ९ करोड ४५ लाख ४८ हजार तथा प्याकेज नं १९ मा ११ करोड ५५ लाख ४४ हजार लागतमा निर्माण गर्नेगरी राजेन्द्र निर्माण सेवाको बोलपत्र स्वीकृत भएको थियो ।
गतवर्ष नै ठेक्का लागेका प्याकेज नं १६, १७ मा काम सम्पन्न भए पनि १८ र १९ मा समयमै काम नहुँदा प्रगति नदेखिएको हो । श्रीबगडमा गतवर्ष निर्माण शुरू गर्ने बेला महाकालीमा बाढी आएकाले प्रभावित भएको थियो । चालू आर्थिक वर्षमा पनि यी दुवै ठाउँमा समयमै काम हुने अवस्था छैन । प्याकेज नं १८ लाई पुलघाटसम्म जोड्न सकिए खलंगा क्षेत्रको साढे चार किलोमिटर पक्की तटबन्ध निर्माण पूरा हुने इन्जिनियर श्रेष्ठको भनाइ छ ।
२०७० सालमा सदरमुकाम खलंगामा बाढीका कारण ठूलो क्षति भएकाले सदरमुकाम जोगाउन महाकाली नदी नियन्त्रण आयोजना शुरू भएको हो । शुरूमा तीन वर्षभित्र निर्माण सक्नेगरी आयोजना शुरू गरिए पनि निर्धारित समयमा काम हुन नसकेपछि २०७६५ मंसिर ५ गते म्याद थप गरिएको थियो ।
संशोधित मितिमा पनि काम हुन नसकेपछि पुनः आर्थिक वर्ष २०७७/७८ सम्ममा निर्माण सक्नेगरी म्याद थप गरिएको थियो । पटकपटक म्याद थप गर्दै जाँदा पनि काम हुन नसक्दा तेस्रो पटक २०७७ मङ्सिर ९ गते पुनः म्याद थप गरी आव २०७९/८० सम्ममा सक्न समयावधि तोकिएको छ । रासस
