काठमाडौं । एनआईसी एशिया ग्रोथ फण्ड २ को इकाई मङ्सिर १८ गतेसम्म मात्र विक्रीमा रहने भएको छ । एनआईसी एशिया क्यापिटल लिमिटेडले सञ्चालन गर्ने गरी यस योजनाको इकाई मङ्सिर ४ गतेदेखि सार्वजनिक निष्कासनमा ल्याएको हो ।
क्यापिटलले प्रतिइकाई १० रुपैयाँ अंकित मूल्यमा १ अर्ब रुपैयाँ बराबरको १० करोड इकाई विक्रीमा ल्याएको हो । विक्री गरिने कुल इकाईमध्ये कुल विक्री भएको इकाई संख्याको १५ प्रतिशत वा १ करोड ५० लाख इकाई कोष प्रवर्द्धक एनआईसी एशिया बैंकलाई सुरक्षित गरी बाँकी रहेको ८ करोड ५० लाख इकाई सर्वसाधारणलाई विक्री खुला गरिएको हो ।
यो इकाई खरीदका लागि छिटोमा मंसिर ७ गतेसम्म आवेदन दिन सकिने व्यवस्था रहे पनि सो अवधिसम्म मागबमोजिम आवेदन नपरेपछि ढिलो अवधि मङ्सिर १८ गतेसम्म विक्री खुला गरिएको हो ।
मङ्सिर १७ गते बिहान १० बजेसम्म यस योजनाको इकाई खरीदका लागि ५४ हजार ७९७ जनाले आवेदन दिएका छन् । सिडिएस एण्ड क्लियरिङ लिमिटेडका अनुसार यी आवेदकहरूबाट ८ करोड ३९ लाख ९० हजार १२० इकाई खरीद माग भएको हो ।
यो इकाई खरीदका लागि न्यूनतम १०० इकाईदेखि अधिकतम १ करोड इकाईसम्म आवेदन दिन सकिनेछ । इकाई विक्रीका लागि खुला गरिएको अवधि तथा बोर्डबाट थप भएको अवधिभित्र कम्तीमा ५० प्रतिशत अर्थात् ५ करोड इकाई खरीद गर्न निवेदन प्राप्त भएमा इकाईको बाँडफाँट गर्न सकिने व्यवस्था छ ।
सो अवधिसम्म न्यूनतम संख्यामा इकाई विक्री नभएमा योजना खारेज गरी १५ दिनभित्र निवेदकहरूको रकम फिर्ता गर्न भुक्तानी प्रक्रिया शुरु गरिने व्यवस्थासमेत छ । योजनाको इकाई खरीदका लागि हालसम्म परेको तथ्यांक रितपूर्वक भएमा करीब ९९ प्रतिशत इकाई विक्री भइसकेको अवस्था छ ।
यो इकाई निष्कासन तथा विक्री प्रबन्धकमा एनआईसी एशिया क्यापिटल लिमिटेड छ । ७ वर्षे अवधिको बन्दमुखी प्रकृतिको यस योजनाको इकाई खरीदका लागि नेपाल धितोपत्र बोर्डबाट अनुमतिप्राप्त सम्पूर्ण आस्बा सदस्य बैंक तथा वित्तीय संस्था र तिनका तोकिएको कार्यालयबाट आवेदन दिन सकिनेछ । साथै मेरो शेयर अनलाइनमार्फत समेत आवेदन दिन सकिनेछ ।
