माघ २३, काठमाडौं। गत महीना अमेरिकामा अपेक्षा गरिएभन्दा धेरै रोजगारी सृजना गरेको छ ।
कोरोना भाइरसको संक्रामक प्रकार ओमिक्रोनका कारण आर्थिक गतिविधिहरु अवरुद्ध भएपनि जनवरीमा रोजगारदाताहरुले ४ लाख ६७ हजार जनालाई काम दिएका छन् । यो विश्लेषकहरुले अनुमान गरेकोभन्दा निकै धेरै हो ।
तर नयाँ कामको खोजीमा भइरहेको जागिर छाड्नेको संख्यामा भएको वृद्धिका कारण डिसेम्बरमा ३ दशमलव ९ प्रतिशत रहेको बेरोजगारी दर गत महीना बढेर ४ प्रतिशत उक्लिएको श्रम मन्त्रालयको तथ्यांकले देखाएको छ । जनवरीमा रेष्टुराँ र बारहरुले कर्मचारी भर्तीलाई टेवा दिएको पाइएको छ । खुद्रा विक्रेता, गोदाम घर र परिवहन व्यवसायमा पनि कर्मचारी भर्ना बढेको छ ।
सुदृढ रोजगारी तथ्यांकले अमेरिकी केन्द्रीय बैंक फिडरल रिजर्भलाई आगामी महीना ब्याजदर बढाउन थप दबाब दिने विश्लेषण गरिएको छ । मन्त्रालयले डिसेम्बरको रोजगारी सृजनासम्बन्धी तथ्यांकमा पनि सकारात्मक संशोधन गरेको छ ।
जनवरीको रोजगारी तथ्यांक ठूलो सकारात्मक आश्चर्य भएको फिच रेटिङका प्रमुख अर्थशास्त्री ब्रियन कोल्टन भन्छन् । कोरोना भाइरसको संक्रमणको हरेक नयाँ लहरले आर्थिक गतिविधि र श्रमिकको मागमा थोरैभन्दा थोरै प्रभाव पारिरहेको पछिल्लो तथ्यांकले पुष्टि गरेको उनले बताए । आगामी महीना बस्ने नीतिगत बैठकमा ब्याजदर बढाउन खोजेको फेडका अध्यक्ष जेरोम पावेलले बताएका थिए ।
बैंकले ब्याजदर बढायो भने यो सन् २०१८ यताको पहिलो पटक हुनेछ । पछिल्लो समय चुलिएको महँगी नियन्त्रण गर्न फेडले ब्याजदर बढाउँदैछ । महँगी करीब ४० वर्षयताकै उच्च स्तरमा पुगेपछि सोमाथि लगाम कस्नु पर्ने दबाब फेडमाथि बढेको छ । बेलायतमा महँगी नियन्त्रण गर्न विगत तीन महीनामा दुई पटक ब्याजदर बढाइएको छ ।
पछिल्लो रोजगारी प्रतिवेदनअनुसार औसत घन्टे तलब भने विगत १२ महीनामा ५ दशलमव ७ प्रतिशतले बढेको छ । तर तलब वृद्धि महँगी बढेअनुसार भएको छैन । तलबमा भइरहेको वृद्धिले मानिसहरुलाई कार्यबलमा फकिर्न भने लोभ्याइरहेको संकेत मिलेको छ ।
गत महीना काम गर्ने वा कामको खोजी गर्ने मानिसहरुको अनुपात महामारी शुरु भएयता पहिलो पटक ६२ प्रतिशत नाघेको थियो । हालैका महीनामा नर्सरी र विद्यालयहरु खुलेपछि श्रम बजारमा महिलाको सहभागिता दर बढेको छ । एजेन्सीहरुको सहयोगमा
