विराटनगर । अक्सिजनको अभाव भएर कोरोना संक्रमितले ज्यान गुमाइरहेका बेला प्रदेश १ बाट मुलुकका अन्य स्थानमा अक्सिजन पठाउन थालिएको छ । मोरङ र सुनसरी प्रशासनको समन्वयमा आवश्यकता र प्राथमिकताका आधारमा अक्सिजन पठाउन थालिएको हो । मोरङका प्रमुख जिल्ला अधिकारी कोषहरि निरौलाले प्रदेशमा अहिले अक्सिजन अभाव नरहेको बताए ।
प्रदेशमा आवश्यकताभन्दा बढी नै उत्पादन भइरहेकाले अति अभाव रहेका अन्य स्थानमा पठाउन सहज भएको उनको भनाइ छ । अक्सिजन आवश्यक पर्ने गम्भीर प्रकृतिका संक्रमितको अकालमै ज्यान गइरहेको अवस्थालाई रोक्ने प्रयास स्वरूप अक्सिजन पठाउने काम भइरहेको निरौलाले बताए । उनका अनुसार यसअघि सामान्य अवस्थामा सिरहा, सप्तरी, धनुषा लगायतसम्म प्रदेश १ बाट अक्सिजन जाने गरेको थियो । तर अहिले कोरोनाका कारण सबैतिर अक्सिजनको हाहाकार हुँदा भैरहवा, डँडेलधुरा, काठमाडौं, मकवानपुर, दाङलगायत स्थानलाई पनि प्रदेश १ मा रहेका उद्योगले भरथेग गनुपर्ने अवस्था आएको प्रजिअ निरौलाको भनाइ छ ।
माग भएका स्थानबाट खाली सिलिन्डर ल्याइएपछि मोरङ र सुनसरीमा रहेका उद्योगले भरेर पठाउने गरेका छन् । मोरङ प्रहरी प्रमुख एसपी सन्तोष खड्काले स्थल र हवाई मार्गबाट धमाधम अक्सिजन पठाउने काम भइरहेको बताए । नेपाली सेनाको स्काई ट्रकको प्रयोग गरेर अक्सिजन पठाउने गरिएको छ । सेनाको जहाजबाट शनिवार पनि दुईपटक भैरहवामा अक्सिजन लगिएको छ भने ढुवानीका अन्य साधनको प्रयोग गरेर स्थलमार्ग हुँदै ५९२ सिलिन्डर बाहिर पठाइएको छ ।
एसपी खड्काले अक्सिजनको अभाव खड्किएका बेला प्रदेश १ ले ठूलो योगदान गरिरहेको बताए । एक साताको अवधिमा सुनसरीबाट २ हजारभन्दा बढी सिलिन्डर अक्सिजन बाहिर पठाइसकिएको सुनसरीका प्रमुख जिल्ला अधिकारी उमेश ढकालले बताए । संक्रमण तीव्र रूपमा फैलिएर अक्सिजनको माग बढ्दा स्वास्थ्य प्रणाली नै अस्तव्यस्त भएकाले आवश्यकता परेका स्थानमा पठाउन थालिएको उनको भनाइ छ ।
मोरङमा दुई र सुनसरीमा तीनओटा अक्सिजन उद्योग छन् । सबै उद्योगले दैनिक २ हजार ७०० सिलिन्डरभन्दा बढी अक्सिजन उत्पादन गर्छन् । प्रदेश १ मा भने अहिले दैनिक १ हजार ५०० सिलिन्डरसम्म अक्सिजन खपत हुने गरेको सामाजिक विकास मन्त्रालयका सचिव गोविन्दबहादुर कार्कीले बताए । अक्सिजनमा प्रदेश आत्मनिर्भर रहेको उनको भनाइ छ ।
यसैबीच, संघीय राजधानीमा अक्सिजनको कमी हुन थालेपछि नेपाली सेनाको जहाजले खाली सिलिण्डर विराटनगर विमानस्थलसम्म ल्याउने र सुनसरी मोरङमा रहेका अक्सिजन प्लान्टबाट अक्सिजन भरेर राजधानी लैजान थालेको छ । नेपाली सेनाले वैशाख २९ गतेदेखि त्यसरी अक्सिजन सिलिण्डर भरेर राजधानी लैजान थालेको हो । पहिलोपटक संखुवासभाबाट संकलन गरिएका १५० थान अक्सिजन सिलिण्डर सुनसरीका हिमाल, मारुती र दुर्गा अक्सिजन प्लान्टमा भरेर ट्रक मार्फत राजधानी पठाइएको थियो ।
त्यसैगरी वैशाख ३० गते ६० ओटा खाली सिलिण्डर विनायक अक्सिजन प्लान्टमा भरेर भैरव गण मोरङले राजधानी पठाएको थियो । ३१ वैशाखमा कृष्णदल गणले जहाजबाट आएका ६० ओटा अक्सिजन सिलिण्डर सुनसरीको पाथीभरा अक्सिजन प्लान्टमा भरेर राजधानी पठाएको थियो । जेठ १ गते ६० ओटा सिलिण्डर भरेर सेनाको जहाजमार्फत भैरहवा लगिएको सैनिक स्रोतले बताएको छ ।
