काठमाडौं । झापा इनर्जी लिमिटेडले सर्वसाधारणमा आईपीओ निष्कासन गर्ने भएको छ । कम्पनीले ६ लाख ६६ हजार ६०० कित्ता शेयर निष्कासन गर्नको लागि विक्री प्रबन्धकमा सिभिल क्यापिटल मार्केट लिमिटेडलाई नियुक्त गरेको छ ।
असार २९ गते झापा ईनर्जी पिङ्गलास्थानमा एक कार्यक्रमबीच कम्पनीले सिभिल क्यापिटल मार्केट शेयर निष्कासन तथा विक्री प्रबन्धकमा नियुक्त गरेको हो ।
सम्झौतापत्रमा कम्पनीका प्रबन्ध निर्देशक सुवास भट्टराई तथा क्यापिटलका निमित्त प्रमुख कार्यकारी अधिकृत शोभना घिमिरेले हस्ताक्षर गरेका हुन् ।
सर्वसाधारणका (स्थानीय, कर्मचारी, वैदेशिक रोजगारीमा रहेका नेपालीसहित) लागि जारी हुने शेयर ६ करोड ६६ लाख ६० हजार रुपैयाँ रकम बराबरको ६ लाख ६६ हजार ६०० कित्ता शेयर सर्वसाधारणमा निष्कासन गर्नका निम्ति नेपाल धितोपत्र बोर्डसमक्ष आवश्यक प्रक्रिया पूरा गरी शेयर निष्कासनको लागि आवेदन दिने कम्पनीको योजना छ ।
आयोजनाको हालसम्म ८० प्रतिशत भौतिक कार्य प्रगति हासिल भएको छ र आयोजना असोज २०८० मा शुरु हुने अपेक्षा गरिएको छ ।
निर्माण अवधिको ब्याजसहित कुल परियोजना लागत ७९.९० करोड रुपैयाँ छ ।
आयोजना निर्माणका लागि माछापुच्छ्रे बैंक र हिमालयन बैंक (साविक सिभिल बैंक लिमिटेड) को नेतृत्वमा रहेको कन्सोर्टियमले ५९ करोड ९० लाख रुपैयाँ आर्थिक सहयोग गरिनेछ ।
साथै कम्पनीले नेपाल विद्युत प्राधिकरणसँग २५ वर्षका लागि प्रतियुनिट ७.३० रुपैयाँमा विद्युत खरिद सम्झौता (पीपीए) गरेको छ।
