दक्षिण एसियाली मुलुक अफगानिस्तानमा चरम मानवीय सङ्कट आइलागेको छ । त्यहाँका नागरिकलाई विद्रोही तालिबान सरकारले सुरक्षा र राहत दिन सकेन । त्यहाँ आर्थिक गतिविधि शून्य छन् । तालिबान सत्ताबाहिर हुँदा पनि जनताले चरम दुःख पाए भने सत्ता कब्जा गरेपछि त झन् अभिशाप साबित भएको छ । बहुसङ्ख्यक गरिब जनता एकातिर हिउँदको अत्यधिक चिसो र जाडोले सताइएका छन् भने अर्कातिर खान नपाएर मृत्युको मुखमा पुग्दैछन् ।
यतिखेर दुई करोड ७० लाख मानिस भोकमरीको चपेटामा परेका छन् । खाद्यान्न र औषधिको चरम अभाव भएको छ । ७० लाखमध्ये ३२ लाख बालबालिका कुपोषणको सिकार भएका छन् । समयमै खाद्यान्न र औषधिको व्यवस्था गर्न नसके १० लाख बालबालिका मृत्युको मुखमा पुग्ने खतरा छ ।
