आजको विश्वमा केही त्यस्ता स्वास्थ्य उपकरण छन्, जसले रोगहरूको उपचार पद्धतिमा आमूल परिवर्तन गराएका छन् । झट्ट हेर्दा सामान्य देखिने यी उपकरणले सानादेखि ठूला रोगको उपचार गर्न सम्भव तुल्याएका छन् । थर्मोमिटर, सिरिन्ज,एक्स–रे, चस्मा, स्टेथेस्कोपजस्ता उपकरणले स्वास्थ्य क्षेत्रमा ठुलो भूमिका निभाएका छन् ।
थर्माेमिटर शब्द ग्रीक शब्द थर्मोस (तातो) र मिटर (मापन) बाट आएको हो । थर्माेमिटर ‘कुनै पनि वस्तुलाई तताउँदा यसको आयतन बढ्छ र चिस्याउँदा आयतन घट्छ’ भन्ने सिद्धान्तमा आधारित छ । यसभित्र तरल पदार्थको रूपमा पारो प्रयोग गरिन्छ । पारोको जोखिमका कारण आजभोलि पारो थर्माेमिटरलाई डिजिटल थर्माेमिटरले विस्थापित गरेको छ ।
शरीर छेड्ने सुई सत्रौँ शताब्दीको मध्यतिर विकास भएको मानिन्छ । हिजाेआज सिरिन्जमा हालेर प्रयोग गरिन्छ । यसको मद्दतले शरीरमा तरल औषधि हाल्न र जाँचका लागि रगत निकाल्न सजिलो बनाएको छ ।
