फागुन २८, काठमाडौं । बैंकिङ कसूर गरेको आरोपमा प्रहरीको केन्द्रीय अनुसन्धान ब्यूरोले काठमाडौंको काँडाघारीबाट शनिवार एक जना व्यक्तिलाई पक्राउ गरेको छ ।
ब्यूरोका अनुसार पक्राउ पर्नेमा दाङको तुलसीपुर उपमहानगरपालिका–८ का ३० वर्षीय अनुप पाण्डे रहेका छन् । अभियुक्तबिरुद्ध बैंकिङ अपराध कसूरमा जिल्ला प्रहरी कार्यालय दाङमा गेहेन्द्रबहादुर बस्नेतको जाहेरी परेको थियो ।
उक्त मुद्दामा अनुसन्धानका लागि उच्च अदालत तुलसीपुरबाट गत फागुन २५ मा पक्राउ पूर्जी जारी भएकामा खोजतलासका क्रममा अभियुक्त काँडाघारीबाट पक्राउ परेका हुन् ।
इञ्जिनीयरिङ एण्ड इन्फ्रा प्रोजेक्ट प्रालिबाट साइड ठेक्का सम्झौता गरी निर्माणको जिम्मा लिएका अभियुक्त पाण्डेले सानिमा बैंकको आफ्नो खातामा रकम नभएको जानीजानी जाहेरवाला बस्नेतको सवारी साधन प्रयोग गरी भाडाबापतको रकममध्ये १ करोड ८ लाख ५७ हजार रुपैयाँको चेक दिएका थिए ।
उक्त चेक नसाटिएपछि बैकिङ कसूर गरेको आरोपमा प्रहरीमा परेको जाहेरीका आधारमा अनुसन्धानका लागि उनलाई पक्राउ गरिएको प्रहरीले बताएको छ ।अभियुक्तलाई थप अनुसन्धान तथा कारबाहीका लागि जिल्ला प्रहरी कार्यालय दाङ पठाउने ब्यूरोले जानकारी दिएको छ ।
